Bono Cultural 2023: así será a convocatoria urxente tras o Real Decreto aprobado hoxe

O ano pasado o prazo para pedir o bono terminou a finais de outubro, pero descoñécese por agora a data en que abrirá e pechará a convocatoria de 2023. En principio, estímase que os detalles da convocatoria deste ano serán moi similares ás de 2022.

Uns 13.000 mozos galegos que cumpriron 18 anos recibiron un cartón prepago de 400 euros para a compra de produtos e experiencias culturais, segundo datos da Delegación do Goberno de Galicia facendo balance da pasada convocatoria.

Con aquel cartón púidose gozar de experiencias e produtos culturais, que se dividen en tres tramos para favorecer a diversificación do investimento, coa seguinte distribución:

• 100 euros para produtos físicos, por exemplo, libros, prensa ou discos.
• 100 euros para produtos dixitais, como prensa dixital, podcast ou videoxogos en liña.
• 200 euros para artes escénicas: teatro, ópera, cine, danza ou museos.

O Consello de Ministros autorizou este martes 31 de xaneiro a tramitación urxente do proxecto do Real Decreto polo que se establecen as normas reguladoras do bono cultural mozo.

Tal e como sinalou o Ministerio de Cultura, trátase dun trámite "puramente técnico", que tamén se adoptou o ano pasado na súa primeira edición, e que permitirá acurtar algúns prazos para a implementación do bono cultural mozo que precisa, en primeiro lugar, da aprobación das súas normas reguladoras.

Estas normas recollen, entre outros aspectos, o obxecto das axudas, os requisitos dos beneficiarios e o procedemento de concesión, así como os requisitos e o procedemento para a adhesión das entidades, para posteriormente poder aprobar e publicar as correspondentes convocatorias.

Cultura sinalou que a tramitación de urxencia das normas reguladoras do Bono Cultural cumpre un dobre obxectivo. O primeiro, "axilizar o proceso para permitir que canto antes os mozos que cumpran 18 anos en 2023 poidan acceder ás axudas".

"E segundo, consolidar e reforzar as medidas de estímulo do sector cultural incentivando coa maior rapidez posible o consumo dos produtos e servizos culturais incluídos no bono", resaltou o Ministerio.