O Dépor pecha o mercado sen ningunha chegada máis e coa saída de Bruno Gama
O club acordou rescindir o contrato do xogador portugués, deixando un oco libre.
Bruno Gama deixa unha ficha libre. Foto: RC Deportivo
Sen novidades no capítulo de chegadas no último día do mercado de fichaxes, o Dépor queda sen o reforzo para o pivote desexado por Cristóbal.
O Dépor traballou nesta xanela de inverno sen Richard Barral para solucionar carencias do persoal. O mesmo Tino Fernández recoñeceu que o mediocentro era o último dos obxectivos do club.
Con todo, desde a praza de Pontevedra non puideron atopar un futbolista para encaixar nesa posición. Así, o balance péchase de momento con tres chegadas (Koval, Bóveda e Krohn-Dehli) e catro saídas, sumando a última hora a Bruno Gama á lista de Arribas, Saúl e Pantilimon.
O club anunciou a última hora do mércores a rescisión do contrato co portugués.
"O Dépor quere agradecer a Bruno todo o achegado ao equipo nas súas dúas etapas defendendo #asnosascores, desexándolle o mellor no seu futuro profesional e persoal".
Este movemento deixa unha ficha libre, que o Dépor poderá usar para incorporar a algún xogador sen equipo.
Escribe o teu comentario