​Augusto Fernández dille 'non' ao Dépor para ir a China

Augusto Fernández subliña o seu pasado celeste.

A poucos días do peche do mercado de inverno, o Dépor ten que seguir buscando candidatos para o centro do campo, tras o 'non' recibido por parte de Augusto Fernández. Tal e como informa Radio Coruña, "máis aló das súas dúbidas sobre o proxecto herculino", o xogador asegurou que o seu rexeitamento está motivado polo seu pasado celeste.

O xogador buscaba os minutos que non ten no Atlético, para gañar o sitio no Mundial de Rusia, pero tras este revés para o Dépor, distintos medios dan por feita a súa saída á Superliga de China, ao Beijing Renhe. Ao parecer, cobrará máis do dobre que no equipo madrileño.

Así, sen novos reforzos, o Dépor afronta este partidos ante o Levante como un choque onde os tres puntos son "vitais". Recoñéceo Cristóbal, que aínda que cre que "loxicamente a ansiedade non é boa", augura que "no caso de gañalo veriamos todo de maneira diferente e seguro que nos axudaría a afrontar os seguintes partidos".

Non está na lista de convocados Emre Çolak, por decisión técnica. O adestrador deportivista declarou este venres que para el "non é un malentendido" e que "non podemos permitir segundo que comportamentos". "Avisaramos de que o que non traballase como debía de facelo mellor que non estivese e non entorpecese aos demais", reprochou.