​Guías de "ciencia cidadá" difundirán o coñecemento de bens comúns

O goberno local da Coruña elaborou as 'Guías de Ciencia Cidadá', unha proposta educativa que busca profundar "no coñecemento de bens comúns e o dereito dos veciños sobre os mesmos", explicou a concelleira de Participación, Claudia Delso, na súa presentación.

O proxecto está composto por nove documentos "prácticos e sinxelos" e que establece un novo marco de colaboración cos Museos Científicos municipais.

Dirixidos á xente nova, estes documentos teñen como finalidade "profundar no coñecemento e na información de recursos da cidadanía", apuntou. Así, o proxecto aborda temas como a paz, a mobilidade urbana, os bosques, a paisaxe ou as infraestruturas.

Esta iniciativa conta co apoio do Concello da Coruña a través do Laboratorio Cidadán Co-Lab, do Medialab-Prado de Madrid e do Ministerio de Educación, Cultura e Deportes.