Veciños de Teis e Chapela apostan por manter a presión polas súas demandas

|

Veciños teis chapela


As asociacións de veciños de Teis (Vigo) e Chapela (Redondela) cualificaron como "un logro" o anuncio da eliminación da peaxe de Rande, alcanzado grazas á "presión social", pero advertiron de que ese anuncio é "insuficiente" e ambas as parroquias manterán as mobilizacións para conseguir outras demandas, como a conversión da AP-9 en viario urbano entre Torres de Padín e o centro da cidade, ou medidas contra a contaminación acústica.


Nunha rolda de prensa, o portavoz da asociación de veciños de Teis, Anxo Iglesias, sinalou que o anuncio debe concretarse en prazos e, en todo caso, debe implantarse a gratuidade "o máis axiña posible".


Con respecto á compensación que Fomento negociará con Audasa para que a eliminación desa peaxe se financie con cargo á tarifa (previsiblemente con incremento das peaxes vixentes na AP-9), Anxo Iglesias precisou que os veciños son "contrarios" a que se repercuta a supresión nunha subida de prezos porque sería unha "medida inxusta" para os usuarios da autoestrada.


Por outra banda, Iglesias lamentou que a Xunta non fose "máis ambiciosa" na comisión mixta, e subliñou que a supresión da peaxe de Redondela debería estar acompañada doutras accións: conversión da AP-9 en viario urbano entre Chapela, Teis e o centro de Vigo, e adopción de medidas antirruido e de humanización das parroquias.


MANTER A PRESIÓN


Por iso, tanto Iglesias como o presidente dos veciños de Chapela, Marcial Pérez, avanzaron que se manterán as mobilizacións e medidas de presión, "porque se demostrou que só así se conseguen as cousas".


Nese sentido, anunciaron que a manifestación prevista para o vindeiro sábado substituirase por unha concentración e asemblea ante o Centro de Saúde de Chapela, ás 19.00 horas. Nese encontro, informarase os veciños sobre a eliminación da peaxe e sobre as demandas que seguen mantendo para ambas as parroquias, entre elas, a eliminación do tráfico pesado en Chapela ou a humanización dos barrios.


Marcial Pérez sinalou que os 11 millóns de investimento anunciados por Fomento para a reposición de servizos e outras melloras en Chapela, para restituír os danos causados pola ampliación da autoestrada, non son suficientes. "Todo o sufrimento de Teis e de Chapela merece máis compensación", afirmou, e incidiu en que a supresión da peaxe é "un primeiro paso" e que, se non se manteñen as mobilizacións, "non haberá máis".


relacionada ​As peaxes da AP-9 subirán outra vez para que o tramo entre Vigo e Redondela sexa gratis
relacionada ​Nova manifestación para que se suprima a peaxe da AP-9 en Rendondela

Sen comentarios

Escribe o teu comentario




Non está permitido verter comentarios contrarios á lei. Nos reservamos o dereito a eliminar os comentarios que consideremos fora de tema.

Galiciapress
Praza da Quintana, 3; 15704 Santiago de Compostela
Tlf (34)678803735

redaccion@galiciapress.es o direccion@galiciapress.es
RESERVADOS TODOS OS DEREITOS. EDITADO POR POMBA PRESS,S.L.
Condicións de uso Consello editorial
Powered by Bigpress