​Feijóo foxe do debate da súa sucesión, pero cre que será "máis fácil" que a de Fraga

|

Feijoo rpconselloFeijóo remite a dentro de tres anos.

O presidente da Xunta trata de aparcar calquera debate sobre a súa substitución no seo do PPdeG e, tras remitirse "ao último ano" dunha lexislatura que finaliza en 2020 como horizonte para abordar este asunto, augurou que a súa substitución será "máis fácil" que a de Manuel Fraga 12 anos atrás, ademais de recoñecer que desexaría que o seu sucesor tivese experiencia de xestión.


Nunha semana que o volveu situar nas quinielas dun eventual salto á política estatal se Mariano Rajoy realizase cambios no seu Executivo, o presidente volveu ratificar, en declaracións a distintos medios de comunicación, o seu "compromiso" con Galicia ata que finalice o seu terceiro mandato, no ano 2020.


Este xoves, na rolda de prensa posterior ao Consello da Xunta, plasmou, ademais, o seu rexeitamento a que o debate no PPdeG se fixe ao redor da súa sucesión. "Vostede ten unha gran capacidade de facer preguntas tres anos antes do que corresponde e quero felicitalo", replicoulle a un xornalista que lle preguntou acerca de se vía o seu partido preparado para substituílo.


A continuación, convocou a formular a mesma cuestión "nunha rolda de prensa de aquí a dous anos e medio ou tres" para poder proporcionar "respostas rigorosas". Dito isto, defendeu que o PPdeG para o que está "preparado" é para as eleccións municipais, que son as que tocan no próximo exercicio, do mesmo xeito que as europeas.


"E aínda hai que facelo con moitísima máis intensidade, despois virán as xerais e logo tocarán as autonómicas. Miren se temos cousas que preparar e cousas importantes", esgrimiu o presidente.


"O PPdeG é un partido renovado; tense que seguir renovando, pero ten a persoas novas que teñen experiencia, que executaron decisións políticas complexas, xestionaron crises económicas... un cadro de mulleres e homes que poden optar a esa candidatura en 2020", reivindicou.


EXPERIENCIA, PERO SEN MÁIS PISTAS


Ante un escenario aberto e un debate do que prefire fuxir, o único que admitiu Feijóo é que el sería partidario de que o seu sucesor teña experiencia de xestión, pero coidouse de concretar en que Administración debería adquirir a dita experiencia.


"Eu non lle daría a delegación de Europa Press a un xornalista que non tivese ningunha experiencia, pódollo asegurar. Sería un gravísimo erro. Para gobernar, necesítase non só querer a Galicia, non só estar a disposición de Galicia por encima de calquera outro compromiso, senón ter experiencia", comparou.


Iso si, a continuación, abriu todo o abanico de posibilidades ao subliñar que se pode "acreditar experiencia de xestión pública" a través de varias vías, é dicir, tanto xestionando "concellos, como deputacións, gobernos autonómicos ou no ámbito da Administración central".


Coa mención de "todo o elenco de posibilidades", Feijóo evitou dar pistas dun perfil máis concreto para a súa substitución. E é que nas quinielas figuran, entre outros, senllos presidentes provinciais do PP en Pontevedra e A Coruña: o vicepresidente da Xunta, Alfonso Rueda, ex secretario xeral do PPdeG e o vicepresidente do Parlamento, Diego Calvo, ex titular da Deputación da Coruña.


Pero tampouco se descarta a conselleiros con experiencia no ámbito municipal como o ex rexedor de Ferrol José Manuel Rey Varela, de quen se dá por feito que volverá presentarse nas próximas municipais na mesma cidade. E nos círculos mesmo se chegou a apuntar como posibilidade á ex ministra de Fomento e actual presidenta do Congreso, Ana Pastor.


SUBSTITUCIÓN "MÁIS FÁCIL" QUE A DE FRAGA


Feijóo, en todo caso, prefire pospoñer o debate "ata o último ano da lexislatura". "E aquí, neste partido, non hai posibilidades máis que o partido decida nun congreso quen pode ser o seu candidato", advertiu, antes de rememorar que acaban de cumprirse 12 anos desde que el se puxo á fronte do PPdeG como substituto do falecido Manuel Fraga.


"Hai 12 anos que o PPdeG decidiu cal era o seu presidente e nese congreso xa se decidiu tamén o candidato; temos experiencia en facer iso", defendeu, antes de admitir que "non foi fácil a substitución de Fraga".


"Eu creo que a miña substitución vai ser máis fácil que esa. Non me fagan seguir falando disto", demandou, antes de subliñar que xa leva varios días realizando declaracións sobreo seu futuro político e o seu posible salto á política estatal.


relacionada Feijóo nega a súa saída cara a Madrid e descarta "unha cuarta lexislatura" en Galicia
relacionada Novos rumores sitúan a Feijóo na próxima reforma do Goberno de Rajoy
relacionada Feijóo rexeita especular sobre se "arrasaría" como "sucesor de Rajoy"

Sen comentarios

Escribe o teu comentario




Non está permitido verter comentarios contrarios á lei. Nos reservamos o dereito a eliminar os comentarios que consideremos fora de tema.

Galiciapress
Praza da Quintana, 3; 15704 Santiago de Compostela
Tlf (34)678803735

redaccion@galiciapress.es o direccion@galiciapress.es
RESERVADOS TODOS OS DEREITOS. EDITADO POR POMBA PRESS,S.L.
Condicións de uso Consello editorial
Powered by Bigpress