Os terreos da intermodal estarán dispoñibles en marzo
A conselleira de Infraestruturas mostrou a súa preocupación polas obras e os accesos da estación santiaguesa.
A conselleira mostrou "preocupación" polos prazos.
O concelleiro de Espazos Cidadáns, Dereito á Vivenda e Mobilidade de Santiago, Jorge Duarte, asegurou este mércores que os terreos que corresponde ceder por parte do Concello para o inicio das obras da estación intermodal estarán dispoñibles a partir do mes de marzo.
Segundo explicou Duarte, o proxecto de expropiación tiña "uns erros" que se corrixiron e aprobaranse no mes de febreiro. Así o anunciou ante a "preocupación" que mostrou este mércores a conselleira de Infraestruturas e Vivendas, Ethel Vázquez, sobre o inicio das obras e a construción dos accesos, despois de que ambos participasen nun acto conxunto en Compostela.
Con respecto aos accesos, a responsable do departamento da Xunta afirmou "non ter información" sobre como se resolverán. A isto replicou Duarte, que asegurou que se atopan "en licitación".
En calquera caso, o Concello ve que están "en tempo" para acabar os accesos "simultaneamente" coa estación intermodal, xa que, segundo precisou, estes precisan dun prazo de nove meses para a execución das obras, mentres que a terminal necesita 18.
"A tramitación urbanística xa está feita", asegurou Duarte, que a continuación sinalou que, "durante este tempo, fixeron o proxecto e a licitación e, durante 2019, levaráse a cabo a obra".
DÁRSENAS
En canto ao número de dársenas, o edil afirmou que "tiveron algunhas diferenzas" porque o Concello "entendía que eran necesarias máis dársenas". "A Consellería aceptou incluír outras (...) e gustaríame que, nesta obra que se licita estes días, estean contempladas todas as dársenas e que non se mingüe o espazo que había na estación actual", sostivo.
Pola súa banda, Vázquez incidiu en que a Xunta estivo "en contacto directo en todo momento" co Consistorio sobre o proxecto e o número de dársenas "e aí está o proxecto xa licitado".
Ademais, a conselleira urxiu a facelo "canto antes". Con todo, Duarte insistiu en lograr "o mellor proxecto posible e que responda as necesidades da cidade". En todo caso, ambos os dirixentes "esperan" que a estación estea terminada a finais de 2019.
Escribe o teu comentario