O PP distribúe un argumentario en defensa da prisión permanente revisable

|

Pp executiva


O PP decidiu instruír os seus cargos para que defendan en toda España a prisión permanente revisable, unha medida coa que o partido quere recuperar a iniciativa política e atacar a Ciudadanos. Con ese obxectivo, distribuíu entre os seus un argumentario interno, ao que tivo acceso Europa Press, no que denuncia que a oposición queira derrogala sen esperar a que o Tribunal Constitucional se pronuncie e resalta que hai unha corrente de opinión pública "moi maioritaria" a favor desta pena.


Os 'populares' puxeron o foco nesta medida aproveitando a resolución do caso Diana Quer. De feito, presentaron mocións nos concellos de toda España e tamén rexistraron unha proposición non de lei no Congreso para que os grupos da oposición rectifiquen e manteñan a prisión permanente revisable no Código penal.


OPINIÓN PÚBLICA


Agora dan un paso máis e queren que os dirixentes do partido en toda España se mobilicen en favor desta figura penal, coa que queren retratar a Ciudadanos pola súa "abstención". Así o manifestou este mesmo domingo en Sevilla o vicesecretario de Política Autonómica e Local, Javier Arenas, ao asegurar que a prisión permanente revisable é "unha conquista social" e criticar a postura do partido de Albert Rivera: "Un partido que quere ser goberno non se pode abster ante temas tan transcendentais, ten que ter un criterio", proclamou.


Despois da desfeita electoral en Cataluña fronte ao avance de Cs, os 'populares' queren recuperar iniciativa política con esta medida penal, que, segundo destaca, "conta co apoio dunha maioría social". Os pais de Mari Luz, Marta del Castillo e Diana Quer uníronse para defender esta pena, que xa conseguiu máis de 340.000 firmas nunha petición iniciada pola nai das nenas asasinadas polo seu pai en Moraña, o primeiro condenado a esta pena.


"Hai unha corrente de opinión pública moi maioritaria en favor da prisión permanente revisable tal como está prevista no noso Código penal, así o demostra unha iniciativa en change.org pedindo 'Non á derrogación da prisión permanente revisable'", sinala o PP no citado argumentario interno, recollido por Europa Press.


"NON É UNHA CADEA PERPETUA"


Segundo o PP, trátase dunha pena extraordinaria "para supostos de extrema gravidade". A finalidade, explica, é impedir que os autores de graves crimes que non demostren a súa vontade de reintegrarse de novo na sociedade volvan recuperar a súa liberdade poñendo en perigo novamente á cidadanía.


"Lamentablemente, quedou demostrado que a capacidade de reinserción non vén ligada exclusivamente ao transcurso do tempo", engade. Así, o PP di que cre na necesidade de acreditala ante un tribunal. "Cando unha persoa comete delitos gravísimos, é conveniente constatar se se produciu a rehabilitación".


"PRÉSAS" PARA DERROGALA


Tras asegurar que o debate sobre a prisión permanente revisable nada ten que ver co cumprimento íntegro das penas, o PP di non entender "as présas" da oposición, que decidiu presentar un recurso ante o Tribunal Constitucional e que foi admitido a trámite. "O máis lóxico sería esperar a que o TC se pronunciase", asevera, para engadir que esta medida foi "avalada" polo Tribunal Europeo de Dereitos Humanos tras a súa aplicación noutros países.


Ademais, o PP lembra que o alto tribunal concedeu a extradición de persoas naqueles supostos nos que o país solicitante ten establecida a prisión perpetua, sempre que esta sexa revisable. Disto despréndese, segundo o partido, que para o TC esta condena "non leva tratos inhumanos nin degradantes".


relacionada O caso de Diana Quer pon de novo no foco a prisión permanente revisable
relacionada O PP pensa "actualizar" a prisión permanente por casos coma o de Diana Quer
relacionada A petición a favor da prisión permanente multiplica o apoio por 15 en menos dunha semana

Sen comentarios

Escribe o teu comentario




Non está permitido verter comentarios contrarios á lei. Nos reservamos o dereito a eliminar os comentarios que consideremos fora de tema.

Galiciapress
Praza da Quintana, 3; 15704 Santiago de Compostela
Tlf (34)678803735

redaccion@galiciapress.es o direccion@galiciapress.es
RESERVADOS TODOS OS DEREITOS. EDITADO POR POMBA PRESS,S.L.
Condicións de uso Consello editorial
Powered by Bigpress