O IPC subiu en Galicia unha décima máis que a media en todo o ano pasado

Aínda que os prezos baixaron en decembro, mentres en España se mantiveron estables, o acumulado marca a diferenza.

Redacción
| Venres, 12 de Xaneiro de 2018, 10:53

Compra supermercado

O Índice de Prezos de Consumo (IPC) reduciuse unha décima (-0,1%) en decembro en Galicia en relación con novembro e baixou a súa taxa interanual seis décimas, ata o 1,2%.

Deste xeito, na comunidade galega, segundo os datos que publica este venres o Instituto Nacional de Estatística (INE), os prezos acumularon un incremento de media do 1,2% o pasado ano.

Por subgrupos, as maiores cifras interanuais correspóndense cos prezos do transporte, cuxo IPC se atopa ao 2,4%; hoteis, cafés e restaurantes, ao 2,1%; e bebidas alcohólicas e tabaco, ao 1,8%.

No lado contrario, as taxas anuais máis baixas son as que rexistran o lecer e a cultura, cun IPC do -0,6%, e o enxoval, que está ao -0,1%.

No conxunto estatal, o IPC mantívose estable (0,0%) en decembro en comparación co mes anterior, pero diminuíu a súa taxa interanual seis décimas, ata o 1,1%, o seu nivel máis baixo do ano e unha décima menos do esperado.