O avogado do 'Chicle' renuncia á súa defensa ao comprobar que lle mentiu

Ramón Sierra visitou o 'Chicle' na Lama.

O avogado de José Enrique Abuín, José Ramón Sierra, renunciou á defensa do autor confeso da morte de Diana Quer ao asegurar que "para poder exercer nun asunto penal, é necesario crer honestamente no que se está facendo e facelo con paixón e con amor á profesión".

Sierra trasladouse este venres ao centro penal da Lama, en Pontevedra, para comunicarlle a súa decisión ao que ata hoxe era o seu defendido, unha renuncia que tamén lle deu a coñecer nesta xornada ao Xulgado de Instrución número 1 de Ribeira que instrúe a causa.

En declaracións aos medios antes de abandonar a prisión, Sierra explicou que lle levou roupa a José Enrique Abuin, quen aínda non se puxo en contacto con ningún membro da súa familia.

Era a primeira reunión entre ambos tras coñecer as partes o informe preliminar da autopsia de Diana Quer, que confirma que a causa do falecemento da moza foi o esganamento e que non acredita, pero tampouco descarta, a posible agresión sexual, á espera de probas complementarias.

PIDEN UNHA RECONSTRUCIÓN

Desde a acusación particular solicitouse unha reconstrución dos feitos ocorridos a noite da desaparición de Diana, na que tería que participar José Enrique Abuín Gey, pero que aínda non foi autorizada polo xuíz, posto que o 'Chicle' "se negou a declarar".

"Cando declare e se lle pregunte se está disposto a facer o recoñecemento pois, obviamente, se se presta a iso, realizarase desde a orixe", manifestou o avogado dos pais da moza ao ser cuestionado sobre se esta reconstrución incluiría zonas como A Pobra.

Con todo, o letrado lembrou que negarse á práctica da reconstrución dos feitos é un dereito ao que se pode acoller o acusado, como a non declarar.