As restricións de tráfico pola neve concéntranse na provincia de Lugo

|

Neve estrada


A circulación no alto do Cebreiro , ao longo de 21 quilómetros, está cortada ao tráfico de camións e vehículos articulados debido ás nevadas, que alcanzaron a súa maior intensidade durante a noite do mércores ao xoves. Está previsto que nas próximas horas a cota de neve se eleve dos 800 aos máis de mil metros de altura e conclúa a alerta que hai actualmente.


Segundo a información que figura na web da Dirección Xeral de Tráfico (DXT), desde as 9,53 horas deste mércores a estrada LU-633 á altura do Cebreiro desde o quilómetro 0 ao 21 en ambos os sentidos ten restricións de circulación.


As condicións de circulación nesta vía son "difíciles" e Tráfico prohibiulles aos vehículos pesados e articulados que circulen por ela.


Tamén pola neve quedou afectada a estrada LU-530, desde o quilómetro 30 ao 58, na Fontaneira (Lugo) en ambos os sentidos. A DXT activou a alerta por pavimento deslizante ás 7,23 horas.


Pola súa banda, a Deputación de Lugo informou de que hai varias estradas afectadas pola neve e o xeo e provocou que se circule con dificultade este xoves debido aos entre 5 e 15 centímetros de neve acumulada.


Este mércores, o organismo provincial mobilizou un dispositivo especial na rede viaria da Montaña con 60 operarios e 32 máquinas quitaneves.


Concretamente, quedaron afectadas a LU-P-3601 de Acebo a Negueira de Muñiz, na Fonsagrada; varios puntos das estradas 3508 e 3509 en Navia de Suarna; outros puntos de estradas provinciais no Cebreiro; e a LU-P-1303 no Courel, que quedaron intransitables.


TEMPERATURAS BAIXO CERO


A alerta por neve está activada ata este xoves pola tarde, aínda que o pico máis alto se agardaba para a madrugada, cando o alto de Xares, na Veiga (Ourense) rexistrou a temperatura máis baixa da que se ten constancia en Meteogalicia, con -4,8 graos. O mércores o mercurio xa descendera aos 4 graos baixo cero nesta mesma estación meteorolóxica.


Ademais, no alto do Cebreiro a temperatura mínima rexistrada foi de -2,3 graos; mentres que nos Ancares, no municipio de Cervantes, foi de -2,4 graos. Máis frío rexistrouse aínda na cabeza de Manzaneda e Carballeda de Valdeorras, con -4,1 graos.


relacionada ​A alerta por neve continúa activa nas zonas de montaña de Lugo e Ourense
relacionada A neve provoca restricións de tráfico en varias estradas das provincias de Lugo e Ourense

Sen comentarios

Escribe o teu comentario




Non está permitido verter comentarios contrarios á lei. Nos reservamos o dereito a eliminar os comentarios que consideremos fora de tema.

Galiciapress
Praza da Quintana, 3; 15704 Santiago de Compostela
Tlf (34)678803735

redaccion@galiciapress.es o direccion@galiciapress.es
RESERVADOS TODOS OS DEREITOS. EDITADO POR POMBA PRESS,S.L.
Condicións de uso Consello editorial
Powered by Bigpress