​Un mozo vigués leva unha malleira por ir a unha manifestación unionista

|

Mani scc unionistaManifestación pola unidade de España, en outubro.


Axentes do Corpo Nacional de Policía detiveron por senllos delitos de odio e de lesións a dous mozos de 23 e 24 anos de idade, con domicilio en Sanxenxo e Vigo, que supostamente agrediron en plena rúa a un mozo ata deixalo inconsciente por participar nunha manifestación a favor da unidade de España.


Segundo informou a Policía Nacional, os feitos ocorreron na madrugada do 10 de decembro na rúa Inés Pérez de Zeta, cando uns mozos se achegaron a outro grupo de mozos e, sen mediar palabra, agrediron a un deles --de 21 anos-- e trataron de agredir a un segundo, que conseguiu zafarse.


A vítima quedou inconsciente ao recibir numerosos golpes, ata que fuxiron os agresores ao aparecer a Policía, que avisou ao 061. A ambulancia trasladou ao ferido ao Hospital Álvaro Cunqueiro con varias pezas dentais rotas e múltiples contusións.


A Policía Nacional apuntou que a agresión se motiva en que a vítima participou a finais de setembro nunha manifestación en Barcelona a favor da unidade de España. A súa foto apareceu ao día seguinte na portada dun xornal británico e desde entón empezou a sufrir ameazas por redes sociais por parte de descoñecidos, aínda que non o denunciou ao crer que non iría a máis.


Por mor destes feitos, os investigadores determinaron que os responsables do ocorrido son catro mozos, dous dos cales son os detidos e outros dous que se tenta identificar, e que algún deles é próximo a grupos radicais (supostamente os Celtarras, ultras do Celta de Vigo). O Xulgado de Instrución número tres de Vigo quedou a cargo da causa.


Fontes policiais confirmaron a Europa Press que os dous mozos foron detidos a finais de ano en días distintos; e unha vez que declararon en comisaría, onde non recoñeceron os feitos, foron postos en liberdade ao ter domicilio coñecido e ao entender que non reincidirán.


Estas mesmas fontes destacaron que esta é unha investigación "complexa", aínda que se conseguiu identificar e deter a dous dos catro autores dos feitos, e, a falta de poñerlles nome e apelidos, xa se coñece quen son os outros dous por imaxes, co que a Policía espera que a súa detención se produza "pronto".


relacionada Agredido un mozo de Ourense por ter a bandeira española no seu perfil de Instagram

Sen comentarios

Escribe o teu comentario




Non está permitido verter comentarios contrarios á lei. Nos reservamos o dereito a eliminar os comentarios que consideremos fora de tema.

Galiciapress
Praza da Quintana, 3; 15704 Santiago de Compostela
Tlf (34)678803735

redaccion@galiciapress.es o direccion@galiciapress.es
RESERVADOS TODOS OS DEREITOS. EDITADO POR POMBA PRESS,S.L.
Condicións de uso Consello editorial
Powered by Bigpress