​Un xulgado reproba a privatización dos parques de bombeiros da Deputación

|

Camion bombeiros



O Xulgado do Contencioso Administrativo número 1 de Ourense confirmou a existencia dun "vicio ou defecto de forma" no procedemento de privatización dos catro parques comarcais de bombeiros de Ourense.


O xuíz apunta que, no canto de producirse unha negociación colectiva previa á concesión, a negociación das condicións dos traballadores realizáronse a través do Consorcio Provincial para o Servizo contra Incendios.


Aínda que a sentenza feita pública polo sindicato non tomba a concesión deste servizo (adxudicado á empresa Veicar SL. en setembro de 2016 por un importe de 17,5 millóns de euros) abre a posibilidade de que a CIG poida presentar unha "revisión de oficio" da resolución de adxudicación do contrato.


O secretario de Organización e Finanzas da CIG, Anxo García, explicou que "antes" de calquera posible decisión o sindicato vaille ofrecer "un acordo" á Deputación de Ourense, responsable do Consorcio Provincial do Servizo contra Incendios, aínda que aínda non están establecidos os termos deste posible acordo.


DEREITOS DOS TRABALLADORES


A sentenza "estima en parte" o recurso presentado polo sindicato contra o acordo tomado no pleno do Consorcio Provincial de Ourense para a prestación do servizo de incendios o 21 de abril de 2016 no que se aprobou o expediente, os pregos, cláusulas e a convocatoria de licitación pública para a privatización deste servizo.


Considera que existe "un defecto de forma" porque a concesión se produciu sen que se constituísen mesas negociadoras entre os representantes dos traballadores e os directivos dos consorcios comarcais que pasaban a ser privatizados (Carballiño, Verín, Valdeorras e Xinzo), nin do consorcio provincial.


Abunda en que se vulnerou o artigo 44,9 do Estatuto dos Traballadores, ao impedir que os representantes sindicais puidesen negociar as condicións de transferencia de traballadores á nova empresa contratista, así como as súas condicións laborais.


Nesta liña a sentenza incide en que foi o Consorcio Provincial (e non a empresa contratista) quen "directamente impuxo esas condicións laborais sen posibilidade de negociación colectiva, previa consulta".


Así, o maxistrado estima que "existe unha vinculación entre os traballadores afectados e a Administración consorcial provincial". Para Anxo García esta afirmación supoñen que os 70 traballadores afectados por esta privatización "pasan a formar parte 'ipso facto' do Consorcio provincial", non da empresa adxudicataria.


ABRE POSIBILIDADE DE ANULACIÓN


Ademais, considera que esta "sentenza complicada" abre varias posibilidades que o sindicato "terá que analizar", como a posibilidade de solicitar a revisión de oficio da nulidade da adxudicación tras a anulación do procedemento de contratación. Tamén se estudará a posibilidade de "presentar unha demanda contra o Consorcio por cesión ilegal de traballadores".


Por último, explicou que a sentenza supoñerá "a paralización" de todos os procesos de negociación colectiva actualmente abertos nos catro Parques de Bombeiros afectados.


A sentenza non é firme, contra ela cabe a posibilidade de interpoñer un recurso de apelación no prazo de 15 días ante o Xulgado do Contencioso Administrativo número un de Ourense, para a súa remisión ao Tribunal Superior de Xustiza de Galicia.


relacionada Os bombeiros provinciais denuncian as represalias da concesionaria

Sen comentarios

Escribe o teu comentario




Non está permitido verter comentarios contrarios á lei. Nos reservamos o dereito a eliminar os comentarios que consideremos fora de tema.

Galiciapress
Praza da Quintana, 3; 15704 Santiago de Compostela
Tlf (34)678803735

redaccion@galiciapress.es o direccion@galiciapress.es
RESERVADOS TODOS OS DEREITOS. EDITADO POR POMBA PRESS,S.L.
Condicións de uso Consello editorial
Powered by Bigpress