A Seguridade Social nega a cesión dun ambulatorio "abandonado"

|

Teis centosaude antigoEdificio reclamado por Vigo.

O alcalde de Vigo, Abel Caballero, arremeteu este xoves contra a Tesourería da Seguridade Social pola negativa deste organismo a ceder gratuitamente ao Concello o edificio do antigo ambulatorio de Teis, co fin de construír unha biblioteca pública.


O rexedor deu a coñecer esta negativa nunha rolda de prensa na que lamentou que a resposta da Seguridade Social fose "non", e que ofrezan, en cambio, alugalo ou vendelo ao Concello, a pesar de que é un inmoble que "leva 10 anos abandonado" e se converteu "nun foco de infección".


Caballero avanzou que lle enviará unha carta ao secretario de Estado de Seguridade Social para "esixirlle explicacións" acerca da "distinta vara de medir" deste organismo. Así, lembrou que, cando a Xunta solicitou a cesión do Hospital Xeral (que se está rehabilitando para albergar as novas dotacións xudiciais de Vigo) "fixéronlla gratis", pero néganlle a cesión do edificio de Teis ao Concello.


"Quero saber que hai detrás desta manobra", proclamou o alcalde, quen ve motivos políticos nesa decisión. "Fano por razóns políticas, contra Teis e contra Vigo", denunciou, e advertiu que o Concello non vai pagar "nin un euro" por ese inmoble, a pesar de que a Seguridade Social "quere facer negocio".


Ademais, anunciou que o goberno local utilizará "todas as pancas legais" para esixir á Tesourería da Seguridade Social que o edificio "estea en condicións. "Terano que reformar e poñer en uso de forma inmediata", advertiu, e insistiu en que leva 10 anos abandonado e deteriorándose sen que no Goberno central, nese tempo, fixese ningún intento por alugalo ou vendelo.


relacionada Abel Caballero: "Galicia ten que saldar unha débeda histórica con Vigo"

Sen comentarios

Escribe o teu comentario




Non está permitido verter comentarios contrarios á lei. Nos reservamos o dereito a eliminar os comentarios que consideremos fora de tema.

Galiciapress
Praza da Quintana, 3; 15704 Santiago de Compostela
Tlf (34)678803735

redaccion@galiciapress.es o direccion@galiciapress.es
RESERVADOS TODOS OS DEREITOS. EDITADO POR POMBA PRESS,S.L.
Condicións de uso Consello editorial
Powered by Bigpress