Unha placa distintiva para os edificios rehabilitados
O Consorcio do Casco Vello de Vigo arranxou e vendeu case 60 edificios do barrio histórico.
Edificio en rehabilitación. Foto: @ConsorcioCCVV
O Consorcio do Casco Vello de Vigo (CCVV) identificará, cunhas placas metálicas colocadas nas fachadas, os edificios que rehabilitou desde 2005, case 60, segundo explicou este xoves en rolda de prensa o delegado territorial da Xunta e presidente deste organismo, Ignacio López-Chaves.
Segundo explicou o delegado, estes distintivos de aceiro inoxidable servirán para identificar aqueles inmobles que foron adquiridos, rehabilitados e vendidos polo CCVV, e están esteticamente adaptados aos espazos onde serán integrados.
"É unha acción máis coa que se consolida a importante intervención que se está realizando no barrio histórico", sinalou López-Chaves, quen lembrou que, antes da acción do Consorcio, a degradación apropiouse do Casco Vello vigués.
Desde a súa creación, o Consorcio adquiriu 74 inmobles, dos que rehabilitou 58 e outros tres están en proceso de recuperación. Con estas actuacións construíronse máis dun centenar de vivendas e 32 locais comerciais.
Escribe o teu comentario