As candidaturas de confluencia das 'mareas' reeditaranse nas municipais

|

Eva solla marea

Eva Solla defende: "Estamos á altura". Foto: @En_Marea

A vicepresidenta do Parlamento Galego e deputada de En Marea, Eva Solla, augurou este xoves que se reeditarán as candidaturas de confluencia das 'mareas' para os próximos comicios municipais de 2019 e cualificou como "aceptable" o traballo das organizacións 'do cambio' na cidades galegas onde gobernan.


Nunha entrevista na Radio Galega, Eva Solla lembrou que, desde a súa propia formación política (Esquerda Unida), se apostou "claramente" polos "procesos municipais" de "confluencia" e augurou que "volverá ser así".


Ao seu xuízo, os partidos políticos teñen un "capital relevante" pero indicou que Esquerda Unida cre "na independencia das mareas e na ausencia de tutela por parte dos partidos". "Creo que ese proceso se vai volver dar", afirmou.


"AÍNDA SE PODE MELLORAR"


Con respecto ao traballo desenvolvido desde 2015 polas 'mareas' nas cidades galegas onde gobernan (A Coruña, Santiago e Ferrol), Eva Solla cualificouno como "aceptable", tendo en conta as "dificultades" que supón a necesidade de ter que chegar a acordos con outras formacións e as restricións impostas, por exemplo en materia económica, polo Goberno de España.


"Fíxose un esforzo importante, nalgunhas cidades con máis dificultades e noutras con menos. Sendo unha nova forza o traballo é aceptable, e no que resta de mandato aínda se pode mellorar moito", aseverou, antes de recoñecer que os problemas na "xestión do día a día" obstaculizan a posta en marcha de medidas, como a aprobación de orzamentos.


"ESTAMOS Á ALTURA"


Con respecto ao traballo do grupo parlamentario de En Marea na Cámara galega, Eva Solla sinalou que este é "positivo" e o seu funcionamento mellorou desde o inicio de lexislatura. "Sempre se pode mellorar máis, pero estamos á altura do traballo que se espera do primeiro grupo da oposición no Parlamento", proclamou.


Solla restoulle importancia ás discrepancias no seo do grupo e relacionounas coa "pluralidade" de organizacións que conforman En Marea.


En todo caso, precisou que a confluencia puxo o seu esforzo e traballo, por encima de consideracións de partido, en defender os intereses de todos os cidadáns galegos. "Sempre houbo diferenzas nalgúns asuntos, pero nunca foron obstáculo para entender que o relevante e urxente son os problemas de pobreza, a situación dos sectores produtivos e servizos públicos", apostilou.


A deputada de En Marea referiuse tamén á necesidade de diálogo e acordo cos demais partidos de esquerda no Parlamento, e lembrou que, a pesar das moitas diferenzas, "hai sintonía" en moitas propostas e debates. "O relevante para os galegos é a proposta política de cada un. Se as deles (PSdeG e BNG) se encadran nas marxes onde traballa En Marea, e as cremos útiles e positivas, aí vannos atopar", engadiu.


relacionada Xulio Ferreiro quere repetir como candidato nas municipais
relacionada Noriega decidirá no verán se repetir como candidato á alcaldía
relacionada As mareas locais poñen en marcha a maquinaria para as eleccións municipais

Sen comentarios

Escribe o teu comentario




Non está permitido verter comentarios contrarios á lei. Nos reservamos o dereito a eliminar os comentarios que consideremos fora de tema.

Galiciapress
Praza da Quintana, 3; 15704 Santiago de Compostela
Tlf (34)678803735

redaccion@galiciapress.es o direccion@galiciapress.es
RESERVADOS TODOS OS DEREITOS. EDITADO POR POMBA PRESS,S.L.
Condicións de uso Consello editorial
Powered by Bigpress