Conclúen as probas de carga da ponte de Rande con case 70 camións
Utilízanse para verificar a capacidade resistente da estrutura
A concesionaria da autoestrada AP-9 completou este martes as comprobacións nos novos carrís da ponte de Rande cunha proba de carga estática na que participaron case 70 camións, e que se suma ás probas dinámicas e de confort, realizadas "con éxito" a pasada semana, segundo apuntaron fontes do Ministerio de Fomento e da dirección da obra.
Esta proba, que comezou pasadas as 23.00 horas, no medio dunha intensa choiva e un forte vento, serve para verificar a capacidade resistente da estrutura e o correcto axuste entre as deformacións previstas no deseño da ampliación e as rexistradas na realidade, a pé de obra.
CINCO FASES
Segundo explicou a directora facultativa dos traballos, Ana Fernández, a proba desenvólvese en cinco fases: en primeiro lugar colócanse os 68 camións (cargados), cun peso de entre 36 e 38 toneladas cada un, na metade da lonxitude dos novos taboleiros.
Posteriormente, concéntranse os vehículos pesados entre o alicerce e a xunta da parte central da ponte, e logo ao revés; nunha cuarta fase realízase a carga de forma individual en cada un dos novos taboleiros; e, finalmente, cárganse ambos os lados.
Estas manobras realízanse co fin de alcanzar o nivel de sobrecarga que indica a normativa aplicable ao deseño de pontes de estrada e as recomendacións do Ministerio de Fomento para a execución deste tipo de probas.
Durante a realización da proba de carga estática tomáronse datos topográficos para comprobar o comportamento da ponte. Ademais desta proba, e dada a singularidade desta infraestrutura (e a da obra de ampliación), tamén se levaron a cabo "probas de carga específicas para verificar o confort dos usuarios" que circularán polos novos carrís.
Escribe o teu comentario