Os impostos municipais, conxelados en 2018 nas cidades

As sete grandes cidades manteñen conxelada boa parte das taxas e os impostos municipais en 2018, un ano no que os galegos deberán afrontar o encarecemento de distintos bens e servizos, entre os que destaca o aumento de case un 4% nas peaxes da autoestrada AP-9.

Esta subida, do 3,81%, non se materializará o 1 de xaneiro, senón que a concesionaria da autoestrada do Atlántico, Audasa, terá que esperar e limitarse a trasladar co comezo do ano a actualización do IPC, dun 1,91%, segundo avanzou o ministro de Fomento esta semana de visita en Galicia.

Outra cousa ocorrerá cos prezos locais, segundo fontes das grandes cidades consultadas por Europa Press. En Santiago, por exemplo, o goberno de Compostela Aberta conxela impostos, taxas e prezos públicos, "mantendo tamén as bonificacións máis elevadas, que permiten unha redistribución máis xusta".

Ademais, a capital galega reivindica un incremento doutras bonificacións como as de familia numerosa, posto que "a saída da crise que algúns aseguran aínda non se reflectiu na cidade, e de aí a decisión de continuar conxelando as taxas".

"NIN O IPC"

En Pontevedra, os cidadáns tampouco terán que facer fronte a ningunha subida, posto que o goberno do BNG conxela as taxas e impostos para o próximo exercicio, despois de catro anos nesta situación.

"E cando dicimos que non sobe nada, é nada", subliñan fontes deste goberno municipal. "Nin o IPC, porque nalgúns concellos din que non soben nada pero increméntase o IPC, dando por feito que non se pode evitar esa subida. En Pontevedra non sobe nin o IPC", resaltan.

En Lugo, o consistorio, do PSOE, mantén "a gran maioría de taxas e tributos municipais conxelados", con algunhas excepcións na liña de bonificación ou exencións.

Así, os lugueses poderán optar á bonificación dun 95% no IBI ás construcións destinadas a actividades económicas agrarias ou gandeiras. Tamén estarán exentas do copago do servizo de comida no fogar as persoas en risco de exclusión social, entre outras medidas.

Na Coruña, segundo o goberno da Marea Atlántica, as ordenanzas fiscais e de recadación para 2018 "profundan nun modelo de cidade máis xusto e redistributivo", a través de novas medidas de progresividade.

Así, os perceptores de prestacións sociais terán "cota cero" na taxa de recollida de lixo e de depuración, como xa sucede desde 2016 co recibo de auga.

En Ourense, este xoves houbo pleno extraordinario para aprobar a modificación da ordenanza fiscal do IBI, que baixará un 10% o próximo exercicio. O resto de taxas e impostos segue "igual", segundo fontes do goberno, do PP.

Os veciños de Ferrol, que se beneficiaron dunha actualización parcial en 2015, non afrontarán modificacións en 2018, posto que a cidade non vai incrementar as ordenanzas fiscais ao entender que no contexto actual non procede subir a carga impositiva.

"En 2015, o que se fixo, para favorecer os pagos, foi ofrecer aos contribuíntes a posibilidade de partir en dous o pago anual do IBI, sen recarga. É a opción maioritaria pola que optaron case todos, para repartir a carga", explican fontes do goberno de Ferrol en Común. Engaden que hai dous anos se melloraron as bonificacións sociais e exencións ás familias con máis fillos e menos ingresos.

OS DATOS DE VIGO

Para 2018, en Vigo, o goberno do PSOE conxela os prezos das escolas infantís e da axuda no fogar. Os usuarios pagarán o mesmo que este ano pero, segundo resaltan as fontes consultadas, "tendo en conta que a inflación foi do 2,2%, terán unha diminución real desta porcentaxe".

A cidade olívica mantén as bonificacións a familias numerosas e parados de longa duración incrementando o mínimo exento do pago nun 2,2% para o abono do IBI, lixo, expedición de documentos, o zoo e os prezos públicos de instalacións deportivas. O importe destas bonificacións ascende a 7 millóns de euros, segundo os datos do goberno. Ademais, aprobou unha baixada do 10% no imposto de rodaxe das motos.

PRESIÓN FISCAL

O Goberno de Vigo defende que as ordenanzas fiscais de 2018 manteñen a Vigo como a cidade "con menor presión fiscal" de Galicia.

E é que, de acordo cos seus datos, a presión fiscal sitúase en 502,86 euros en Vigo, fronte aos 746 euros de Ourense, 625 na Coruña, 615 en Pontevedra e 584 en Lugo.

"Se se ten en conta o gasto corrente por habitante e o esforzo investidor por habitante, o importe dos impostos pagos é menor que o que se recibe das arcas públicas municipais", indican as fontes municipais viguesas.

AUTOESTRADAS

Onde os galegos si deberán afrontar unha subida de prezos no ano que está a piques de empezar será nas autoestradas de peaxe da comunidade.

Así, cruzar a AP-9 de Tui a Ferrol sairá 83 céntimos máis caro en 2018, ata un total de 22,98 euros, cando se complete o incremento previsto por Audasa. A concesionaria prevé aplicar un incremento do 3,81% nas peaxes deste viario, pero non poderá facelo ata que así o autorice un Consello de Ministros.

No que respecta ás autoestradas da Xunta, a AG-55 (A Coruña-Carballo) e a AG-57 (Vigo-Baiona), o incremento será do 1,57%, de acordo cos datos que achega a Consellería de Infraestrutura.

O departamento apunta que este aumento ten unha repercusión moi distinta para os diferentes tramos, e para vehículos lixeiros e pesados, tendo en conta que as peaxes se aplican con redondeos de 5 céntimos.

OUTROS CAMBIOS

Outras subidas de prezos en 2018 daranse na luz (o Ministerio de Enerxía augurou unha subida do 10% na factura ao peche de 2017) e está por ver que evolución seguen a bombona de butano (que baixou en setembro) e o gasóleo e a gasolina (Galicia adoita liderar o ranking de maiores custos neste ámbito).