Unha pequena adega galega gáñalle a batalla a Codorníu

As grandes compañías adoitan temer que as súas marcas consolidadas no mercado saian prexudicadas por novos produtos con nomes parecidos. Ás veces esta desconfianza dá lugar a un exceso de celo.

É o caso da batalla xudicial que acaba de gañar unha pequena adega de Meaño (na comarca do Salnés) a Codorníu. O Tribunal Superior de Xustiza de Galicia permítelle ao seu propietario, Carlos Rey, comercializar o albariño bautizado como 'Anadigna' (en recordo á súa avoa María Anadigna), ao entender que non se vai confundir co cava 'Anna' do xigante catalán.

"O parecido fonético entre elas non é da entidade suficiente para que poida producir confusión no mercado", reza a sentenza ditada tras o recurso de Codorníu. E iso, unido á "pouca extensión e mínima produción" do viño. Tamén o entendeu do mesmo xeito nun primeiro momento a oficina de patentes e marcas para dar luz verde á súa solicitude.

Con tres mil botellas do seu albariño xa etiquetadas, este adegueiro declara a La Voz de Galicia que perdeu "un ano completo" e levoulle oito meses crear outra marca, que acabou sendo 'Nadigna'.

Porén, o periplo xudicial do novo viño non acabou, pois Codorníu pode aínda recorrer o fallo ante o Tribunal Supremo. "Gañeille e voulle volver gañar. Cando che dan a razón sénteste máis forte", proclama Carlos Rey.

O adegueiro confía, por tanto, en que o alto tribunal lle volva dar a razón "porque o 'Anna' de Codorníu non o confunde ninguén".