​Galicia cambiará as alertas por seca para adaptalas ao cambio climático

|

Sequia eiras encoro


A Consellería de Medio Ambiente iniciará en 2018 a revisión do plan da seca, que prevé modificar as fases actuais de alerta (prealerta, alerta e emerxencia) por dous escenarios técnicos de seca: prolongada e escaseza.


Segundo informa a Xunta, ten como obxectivo que esta actualización estea lista en 2019, con base nos novos criterios presentados este xoves no Consello Nacional da auga, celebrado en Madrid --onde participou o director de Augas de Galicia, Roberto Rodríguez--.


O Goberno galego sinala que "é imprescindible" diferenciar entre unha seca prolongada, cando se produce un período temporal amplo de carencia de precipitacións, e de escaseza, cando non existen recursos hídricos suficientes para atender as demandas existentes.


Este cambio farase no momento no que se complete a revisión do plan de seca da Demarcación Galicia-Costa (aprobado en 2013), que será actualizado para ser aprobado en 2019.


Roberto Rodríguez explicou que Galicia debe traballar nesa coordinación porque a súa conca está "practicamente repartida" pola metade entre dúas grandes demarcacións, unha que depende de Galicia e outra que depende do Estado (Miño-Sil). Así, sinalou que é "lóxico" que á hora de afrontar un evento como poden ser as consecuencias que pode levar a seca, os criterios "deban ser comúns".


NOVOS CRITERIOS


Estes criterios traerán como consecuencia unha nova terminoloxía en termos de seca e poderase falar de situacións de 'seca prolongada' e de 'escaseza'. Así, a comunidade autónoma que, na actualidade, vive unha situación de alerta, pasaría a denominarse como unha situación de "seca prolongada".


O titular de Augas de Galicia, en relación á explicación desta terminoloxía, aclarou que a Comunidade ten un déficit recursos hídricos, pero que non se atopa ante unha situación de escaseza. "Non hai un risco inminente de falta de dispoñibilidade dos recursos", apuntou.


relacionada A alerta por seca seguirá ata que os ríos recuperen o seu caudal normal
relacionada A alerta por seca esténdese a toda Galicia á espera dun inverno chuvioso

Sen comentarios

Escribe o teu comentario




Non está permitido verter comentarios contrarios á lei. Nos reservamos o dereito a eliminar os comentarios que consideremos fora de tema.

Galiciapress
Praza da Quintana, 3; 15704 Santiago de Compostela
Tlf (34)678803735

redaccion@galiciapress.es o direccion@galiciapress.es
RESERVADOS TODOS OS DEREITOS. EDITADO POR POMBA PRESS,S.L.
Condicións de uso Consello editorial
Powered by Bigpress