O CHUS estrea novo hospital de día de hematoloxía con capacidade para cen pacientes

O Complexo Hospitalario Universitario de Santiago (CHUS) estrea novo hospital de día de hematoloxía este 13 de decembro, con capacidade para dar asistencia a uns cen pacientes.

Segundo informa o CHUS, conta con dez postos e tres camas para recibir tratamentos, cinco consultas, unha sala de biopsias, unha consulta de enfermería e outra médica para atender a pacientes trasplantados, catro baños, tres office e un control de entrada.

Ao respecto, explica que se trata de "un amplo espazo que lles permite aos pacientes hematolóxicos contar cun hospital de día independente" o que, engade, "repercutirá na axilización dos tratamentos, nunha atención máis personalizada e na mellora do confort".

Deste xeito, o complexo hospitalario compostelán garante "a máxima calidade na atención sanitaria que lle presta a todos os usuarios, pero con especial excelencia aos pacientes con patoloxía oncohematolóxica".