A última proposta sobre cotas de pesca antóllase "insuficiente" para Galicia

“Insuficiente”. Así describiu a conselleira do Mar, Rosa Quintana, a proposta que os ministros dos Vinte e oito rexeitaron este martes sobre as posibilidades e cotas de pesca da frota comunitaria en 2018. Doutra banda, cualificou como "moi dura" a negociación entre os responsables de Pesca dos países do bloque comunitario, aínda que non rexeita a posibilidade de "boas noticias".

"Parécenos non aceptable o que nos propoñen no caso da pescada sur, os galos e o rape", expresou aos medios de comunicación en Bruxelas tras cualificar de insuficificente a proposta para o boquerón.  Rosa Quitana sinalou que o documento elaborado pola presidencia de Estonia e rexeitado polos ministros melloraba "un pouco" a situación da anchoa ou boquerón do Golfo de Cádiz, pero non a do resto de especies de interese para a frota española.

"Seguimos negociando, non entendemos que algúns outros países saian mellor que nós nas propostas da Comisión,  subliñou, tras destacar a "igualdade de peso para criterios ambientais, sociais e económicos" como principal liña de acción .

"Bo camiño" para a pesqueira da sardiña

En canto ao plan de xestión para a pesqueira da sardiña, a conselleira do Mar asegurou que vai "polo bo camiño", aínda que non foi tan optimista como a ministra portuguesa, Ana Paula Vitorino, que practicamente descartou o peche da pesqueira. 

Rosa Quintana non dá por seguro que o plan "estea aprobado" debido á posibilidade dalgunha recomendación ou mellora por parte da Comisión. "Comunicarannos as súas consideracións unha vez que o estuden e analíceno", sentenciou.