​A Xunta aproba en plena ponte de decembro a reforma que reduce as áreas sanitarias

|

Feijoo almuinha


O Goberno autonómico aprobou este xoves para a súa remisión ao Parlamento, onde o PP goza da maioría absoluta, a reforma que "actualiza" a lei galega de saúde de 2008 e que, como asegura a Xunta, introduce a "blindaxe legal" dos 14 hospitais que hai na comunidade, incluídos os comarcais.


Así o explicaron Núñez Feijóo e o conselleiro de Sanidade, Jesús Vázquez Almuiña, na rolda de prensa posterior ao Consello da Xunta, que deu luz verde a esta norma que mantén a reorganización prevista para a xestión sanitaria de sete áreas --Salnés, Monforte e A Mariña caen da lista e intégranse nas áreas de Pontevedra e Lugo-- e crea 14 distritos. Así, mantéñense só A Coruña, Santiago, Ferrol, Lugo, Ourense, Pontevedra e Vigo.


Ante as mobilizacións veciñais que nas últimas semanas clamaron contra a supresión das súas áreas sanitarias, o conselleiro defendeu esta reorganización e tanto el como Feijóo subliñaron que "por primeira vez" en Galicia quedarán "blindados por lei os hospitais comarcais". "Ningún goberno poderá tocalos salvo que haxa unha autorización do Parlamento", proclamou o presidente, quen destacou que a norma facilita "a participación" en todos os ámbitos.


En canto ao concurso aberto permanente, o presidente avanzou que a nova lei permitirá aos profesionais concursar cada vez que haxa unha vacante, o que facilitará "a conciliación". Ata agora as prazas acumulábanse e, segundo concretou Almuiña, "para non ter a xente examinándose continuamente", había concursos "cada dous ou tres anos".


O obxectivo agora é, unha vez que se perfile o sistema, que as vacantes poidan cubrirse cun profesional de forma estable "no menor tempo posible". "A idea é que o podamos facer unhas tres veces ao ano", explicou Almuiña.


"MAQUILLAXE"


Pola súa banda, o PSdeG fixo fincapé en que a aprobación no Consello da Xunta da nova Lei de Saúde para remitila ao Parlamento prodúcese en plena ponte e cualificou de "maquillaxe de mala calidade" a creación de 14 distritos.


En opinión do portavoz da área sanitaria no Grupo Socialista, Julio Torrado, "o que queren esconder é que non van dar un paso atrás na súa folla de ruta para sabotear a sanidade pública". Respecto diso, censura que o PP "nin sequera teña a valentía de admitir que todos os hospitais incluídos nos pretendidos distritos en realidade son absorbidos polas áreas sanitarias".


REXEITAMENTO NA RÚA


A portavoz do BNG, Ana Pontón, denuncia o "novo recorte" nos servizos sanitarios que "se esconde" detrás da reforma. E é que denuncia que "prioriza o criterio económico e afecta negativamente á calidade asistencial".


Ademais, Ana Pontón avisa dunha "gran fronte social" contra o modelo do PP e cualifica o seu modo de actuar de "soberbia e desprezo á opinión dos cidadáns", que rexeitaron na rúa a reforma da lei de saúde.


relacionada SOS Sanidade Pública lanza a súa ofensiva contra a reforma da lei de saúde
relacionada Vilagarcía sae á rúa contra o desmantelamento da área sanitaria do Salnés
relacionada Persoal sanitario de Santiago solidarízase cos compañeiros das áreas ameazadas
relacionada Monforte sae á rúa loitando por non perder a área sanitaria

Sen comentarios

Escribe o teu comentario




Non está permitido verter comentarios contrarios á lei. Nos reservamos o dereito a eliminar os comentarios que consideremos fora de tema.

Galiciapress
Praza da Quintana, 3; 15704 Santiago de Compostela
Tlf (34)678803735

redaccion@galiciapress.es o direccion@galiciapress.es
RESERVADOS TODOS OS DEREITOS. EDITADO POR POMBA PRESS,S.L.
Condicións de uso Consello editorial
Powered by Bigpress