SOS Sanidade Pública lanza a súa ofensiva contra a reforma da lei de saúde
Promoverá mocións en todos os concellos da área sanitaria
A plataforma SOS Sanidade Publica de Pontevedra mostrou a súa rotunda oposición ao anteproxecto de reforma da Lei galega de saúde do ano 2008, e promoverá mocións en todos os concellos da área sanitaria pontevedresa.
Con esta proposta, a plataforma pretende solicitar á Consellería de Sanidade a paralización deste proxecto, que implica un importante recorte á sanidade pública en beneficio de empresas privadas, segundo defenderon, empeorando a calidade sanitaria e o seu alcance a todo o mundo.
O anteproxecto supoñería ademais eliminar áreas sanitarias como a do Salnés e prexudicar servizos de Atención Primaria, tal e como declarou o presidente da Federación de asociacións de veciños Castelao, Juan Loureiro. Pola súa banda, Anxo Recuncho, de SOS Sanidade Pública, defendeu que isto provocará, en consecuencia, a saturación dos servizos sanitarios urbanos e os seus correspondentes listas de espera.
A plataforma pide que se restitúan as xerencias de Atención Primaria e que llas dote de recursos, así como o consenso de todas as forzas políticas e sindicais. SOS Sanidade de Pontevedra participará na convocatoria dunha manifestación contra esta reforma da lei, a mediados de xaneiro en Santiago de Compostela.
Escribe o teu comentario