O PP "anula" a ILP da tarifa eléctrica galega e víraa cara á eficiencia enerxética

|

Bombillaelectricidadluz



O Parlamento de Galicia aprobou, cos votos favorables do PP, a nova lei de medidas de eficiencia enerxética e garantía de accesibilidade á enerxía eléctrica, sacando adiante un texto no que se deixa fóra a implantación dunha tarifa eléctrica galega.


O percorrido desta norma parte dunha iniciativa lexislativa popular (ILP) presentada polo sindicato CIG e rexistrada en 2015, orientada a garantir este ben como servizo público e loitar contra a pobreza enerxética.


Na sesión plenaria deste luns abordouse o ditame da comisión de enerxía sobre a proposta que, tras a incorporación das emendas do PP, rematou canalizada cara á eficiencia enerxética.


A deputada do BNG Noa Presas arremeteu contra a vontade de "cernar" a ILP por parte do PP, a pesar de que esta iniciativa naceu cunha "lexitimidade irrefutable" con máis de 17.000 firmas e o apoio de máis de 50 concellos e de tres deputacións.


Así, e "dous anos despois", tras "atrasala" no tempo, este luns vótase unha proposta "baleirada" de contido, considerou. "Nin tarifa eléctrica galega" nin enerxía "como ben público", lamentou, criticando esta "declaración de intencións" sobre eficiencia mentres, de forma paralela, redúcense un 37 por cento os orzamentos autonómicos dedicados a este fin.


Presas defendeu a necesidade dunha tarifa eléctrica e unha redución das peaxes enerxéticas, advertindo de que un cuarto da poboación, segundo os seus números, atópase en exclusión social.


Así, lembrou a contribución galega como xeradora enerxética e parafraseou ao presidente do Goberno, Mariano Rajoy, para ironizar con que "unha cousa é ser solidario e outra cousa é selo á conta de nada".


Desde o grupo socialista, Abel Losada criticou a "falta de ambición" do texto definitivo e o atraso tras "30 meses de tramitación".


Losada viu excesivo o beneficio neto das grandes compañías, que ascende a 11.000 millóns de euros, de acordo cos seus datos, e censurou que as emendas do PP son "débiles" en relación aos mecanismos de compensación a rendas máis baixas.


Aínda que o seu grupo non concorda coa tarifa eléctrica propia, apostou por corrixir os custos engadidos a Galicia pola vía fiscal, para que se traslade por impostos ás tarifas dos consumidores.


TARIFA "SEPARATISTA"


Pancho Casal, o grupo de En Marea, denunciou que a pobreza enerxética representa "unha das maiores inxustizas" da sociedade, e advertiu de que o bono social aprobado no Congreso só chegará ao 5 por cento dos galegos nesta situación dun total de 600.000, segundo os seus cálculos.


Así mesmo, acusou aos populares de "combater o autoconsumo" para así permitir que se fixen "prezos desmesurados" que "engordan as contas de resultados", e defendeu un control "público" da distribución e transporte enerxético.


Finalmente, Marta Nóvoa (do grupo popular) defendeu que a nova formulación do texto supoñerá blindar o pago do 50 por cento do recibo da luz aos fogares con menos recursos, e que non se lles poderá cortar a subministración.


A deputada lembrou, así mesmo, que a maioría dos expertos que compareceron na comisión rexeitaron a tarifa eléctrica "separatista" porque "Galicia non ten competencia", e advertindo de que supoñería un encarecemento da factura dun "40 por cento máis".


PROTESTA DA CIG ANTE O PARLAMENTO


Na mesma xornada de aprobación da norma, a CIG convocou unha protesta ás portas da Cámara autonómica para "denunciar o atentado á democracia" que, en palabras do seu secretario xeral, Paulo Carril, significa que o PP "deixe sen efecto e anule" a iniciativa popular impulsada no seu día e que, hai case dous anos, foi "admitida a trámite de forma unánime polo Parlamento".


Varias decenas de persoas participaron na concentración, na que, entre outras cuestións, reivindicouse unha tarifa eléctrica galega. Antes da protesta, Carril lembrou que a iniciativa popular que se rexistrou estaba avalada, entre outras administracións, por máis de medio centenar de concellos --entre eles as principais urbes galegas-- e sumaba "máis de 18.000 firmas".


Carril identificou a actitude dos populares con "un atentado grave" contra a "participación popular" e denunciou que a formación que lidera Alberto Núñez Feijóo "renuncie unha vez máis a defender os intereses dos galegos", e estea "máis preocupado en silenciar e calar" aos colectivos que reivindican "iniciativas para o desenvolvemento económico e social, e o benestar".


"O único que temos como resposta son o desprezo, o silencio e a anulación, fronte aos bicos e abrazos que Feijóo e o seu Goberno dan ás grandes eléctricas", advertiu, antes de lamentar que os populares "non exerzan as súas competencias" e impidan que os galegos poidan "beneficiarse dos seus recursos" resignándose a ser "un pobo de expoliados" para o "desenvolvemento" doutros territorios do Estado.


relacionada Feijóo desbota unha tarifa eléctrica galega porque "ningún español" o entendería

Sen comentarios

Escribe o teu comentario




Non está permitido verter comentarios contrarios á lei. Nos reservamos o dereito a eliminar os comentarios que consideremos fora de tema.

Galiciapress
Praza da Quintana, 3; 15704 Santiago de Compostela
Tlf (34)678803735

redaccion@galiciapress.es o direccion@galiciapress.es
RESERVADOS TODOS OS DEREITOS. EDITADO POR POMBA PRESS,S.L.
Condicións de uso Consello editorial
Powered by Bigpress