​O Campus Terra terá unha granxa experimental de leite o próximo curso

A instalación ocupará 30 hectáreas de superficie.

O presidente da Deputación de Lugo, Darío Campos, e o reitor da Universidade de Santiago (USC), Juan Viaño, subscribiron un convenio este luns para desenvolver unha "granxa experimental" de leite na Granxa Gayoso Castro, no municipio de Castro de Rei.

Segundo explicaron, prevese que comece a funcionar a partir do curso 2018-2019 no mesmo lugar onde se asentará o primeiro centro de recría público de Galicia.

Tras a rúbrica, o presidente provincial, Darío Campos, detallou que a Deputación de Lugo destinará máis duns 1,3 millóns e 700.000 que achegará a Universidade de Santiago.

A superficie da parcela da granxa será de 30 hectáreas, dos que 4.400 metros cadrados dedicaranse a "superficie urbanizada", que se distribúe con máis de 2.400 metros cadrados para "a nave de gando de leite", 1.050 metros para a fosa de xurro, 560 metros para "silos", 480 para a nave de maquinaria e 387 metros cadrados para o "edificio de prácticas", que poderán utilizar alumnos de Veterinaria e da Escola Politécnica Superior.

Campos sinalou que esta actuación inscríbese dentro do "compromiso" do goberno provincial co "rural", e coa vista posta en fortalecer a Facultade de Veterinaria para que siga "sendo un referente en Europa".

Pola súa banda o reitor da USC, Juan Viaño, agradeceu a "colaboración" da Deputación, á vez que precisou que se está aínda no proceso de licitación, aínda que confía que para mediados de 2018 estea concluída a infraestrutura para que se incorpore ao próximo curso 2018-2019.

Así mesmo, dixo que se abundará en "actividades de investigación e formación continua", ademais de incidir en que supón unha aposta "pola innovación e o coñecemento". Isto, ao seu xuízo, "reforzará o Campus Terra".