O BNG leva ao TC o veto do PP a debater no Congreso a transferencia da AP-9

Inauguración das obras de ampliación.

O BNG presentará o luns en Madrid ante o Tribunal Constitucional recurso de amparo fronte o "antidemocrático" veto do debate sobre a transferencia da autoestrada AP-9 no Congreso dos Deputados.

Así o anunciou este venres a portavoz nacional do Bloque, Ana Pontón, quen, en rolda de prensa, cargou contra este "atropelo" e chamou a "restablecer a dignidade" do Parlamento galego, que aprobou por unanimidade unha iniciativa para que a Cámara Baixa debatese este asunto.

Segundo destacou, ao BNG gustaríalle que este fóra un recurso que presentasen todos os grupos --como xa expuxo no seu día--, para manter esa "suposta unidade", pero lamentou que no momento "clave" o presidente da Xunta, Alberto Núñez Feijóo, "nin está nin se lle espera". "Prégase á primeira", criticou.

Neste sentido, a tamén portavoz dos nacionalistas no Pazo do Hórreo atribuíulle "morneza" e "complicidade" ao líder dos populares galegos, pero avisou de que, polo que a eles respecta, "non vai ser un obstáculo" para "manter vivo o debate". Así, advertiu de que o Bloque "non vai tirar a toalla".

CONTRA A "ESTAFA LEGALIZADA"

Para Pontón, a reclamación da transferencia da titularidade da autoestrada do Atlántico é "xusta", para lograr unha xestión "máis eficaz" e "acabar cos abusos" que identifica nas peaxes.

Precisamente, considera que sería útil para que as decisións sobre as peaxes e o "posible rescate" desta vía se decida "desde Galicia", e "non esperar a ver que pasa en Madrid".

Ese cambio de titularidade ha de ser, ao seu xuízo, o "primeiro paso" contra a "estafa legalizada das peaxes", e para combater un "negocio redondo para Audasa", a concesionaria, "á conta do diñeiro dos galegos".

"O peor que poderiamos facer como país é achantar ante un abuso que ten dous responsables directos, Ana Pastor e Mariano Rajoy", sentenciou a líder nacionalista, antes de insistir en que ambos os mandatarios galegos teñen en Feijóo o "cómplice necesario", e que sen el "non se atreverían a ir tan lonxe".

Por iso é polo que o BNG vai presentar un recurso ante o Constitucional, "consciente" de que tribunal se trata, polo que acode con "todas as cautelas", pero tendo en conta que é "a única vía" á que poden optar, debido a que "é o árbitro que hai".

A decisión que este tome virá determinada polo contido do recurso, que xa está elaborado, e os feitos que se denuncian, "non polo número de grupos" que o presenten, opinou.

Por último, recoñeceu que non cre que haxa "moitos antecedentes" dunha situación coma esta, debido a que tampouco os hai "de vetos a tramitacións de leis que aprobou por unanimidade un parlamento".