Médicos do Clínico aseguran que houbo atrasos en tratamentos de hepatite C a pacientes graves

|

Hepatite CImaxe dunha protesta da plataforma.


Dous médicos do Hospital Clínico de Santiago declararon ante o xuíz que a concesión de tratamentos contra a hepatite C sufriu "atrasos" por mor de "trabas" e de criterios "arbitrarios" motivados polo seu "alto impacto económico".


Así o dixo, en declaracións a Europa Press, a avogada da acusación particular, que exerce a Plataforma de Afectados pola Hepatite C, e que acudiu ás vistas de testemuños ordenadas polo xuíz instrutor esta semana.


O caso, que investiga ao actual xerente da área sanitaria viguesa, Félix Rubial, ex director de Asistencia Sanitaria, e á subdirectora de Farmacia, Carolina González-Criado, trata de determinar se houbo irregularidades na subministración dos novos tratamentos para esta enfermidade que puidesen derivar na morte de pacientes, como denunciou con especial intensidade a asociación Plataforma de Afectados pola Hepatite C.


Entre as persoas citadas a declarar por Andrés Lago Louro, este xoves compareceron como testemuñas dous médicos do servizo de transplantes do Clínico de Santiago, que se reafirmaron ante o maxistrado na súa declaración previa e apoiaron "as teses" da acusación.


ATRASOS E TRABAS


Segundo a avogada da Plataforma, ambos os facultativos dixeron que "existiron atrasos na autorización destes tratamentos" a pacientes en situación grave e que a "decisión de restrinxir os criterios levouse a cabo de forma arbitraria" e baseada en cuestións de "financiamento".


Os médicos recoñeceron que se trata de "tratamentos de alto impacto económico" e que os facultativos que o solicitaban tiñan "trabas para obtelos", con atrasos de "ata catro meses" nos que os pacientes empeoraban significativamente a súa saúde.


Estes médicos, xunto co doutor Evaristo Varo, que este xoves non puido declarar por compromisos profesionais, foron os que "iniciaron o proceso de denunciar" os atrasos, comunicaron aos seus superiores que os criterios de adxudicación "eran restritivos" e instaron aos pacientes e aos seus familiares a denuncialo.


Os outros testemuñas que compareceron este xoves, explicou a avogada da acusación, limitáronse a "seguir a tese do Sergas" e asegurar que "non lembran" ou non lles "consta" os criterios que se empregaron para estes tratamentos.


Tras esta rolda de testemuñas, a acusación mantén ante o maxistrado do Xulgado de Instrución número 3 de Santiago a petición de que declaren tamén nesta fase pacientes e familiares que se viron involucrados neste proceso ou que tiveron coñecemento dos atrasos.


CRITERIOS CLÍNICOS


A Xunta sostén que as novas declaracións na causa por tratamentos de hepatite C "confirman a correcta actuación, baseada en criterios exclusivamente clínicos, dos membros da subcomisión de Farmacia".


Nun comunicado, a Consellería de Sanidade asegura que "os testemuños do persoal facultativo, de farmacia e de xestión económica acreditan que non se lle pode atribuír ao funcionamento da subcomisión ningún atraso na dispensación dos fármacos".


Sanidade insiste en que se actuou seguindo os protocolos farmacoterapéuticos establecidos polo Sistema Nacional de Saúde (SNS) e o Ministerio de Sanidade para "garantir un acceso homoxéneo e igual de toda a cidadanía a estes novos medicamentos", que, "nesa fase, aínda non estaban autorizados nin tan sequera para ser comercializados en España".


Así, a Xunta afirma que esa subcomisión resolveu os casos "de maneira rápida, cunha media de 13 días nunha enfermidade que ten un desenvolvemento de entre 30 e 40 anos".


"Para o Sergas, a subcomisión da hepatite actuou, en todo momento, seguindo criterios facultativos para o acceso dos cidadáns a estes novos fármacos, e, en ningún caso, tivéronse en conta razóns orzamentarias ou doutro tipo nas decisións da Administración", asevera.


relacionada "Falta de colaboración" do Sergas sobre as irregularidades no tratamento de Hepatite C
relacionada O xuíz chama a outras 30 testemuñas polos "atrasos" nos tratamentos de hepatite C

Sen comentarios

Escribe o teu comentario




Non está permitido verter comentarios contrarios á lei. Nos reservamos o dereito a eliminar os comentarios que consideremos fora de tema.

Galiciapress
Praza da Quintana, 3; 15704 Santiago de Compostela
Tlf (34)678803735

redaccion@galiciapress.es o direccion@galiciapress.es
RESERVADOS TODOS OS DEREITOS. EDITADO POR POMBA PRESS,S.L.
Condicións de uso Consello editorial
Powered by Bigpress