Francisco Rodríguez: "Non había outra forma de facer a contratación"

O ex alcalde de Ourense, Francisco Rodríguez (PSOE), xustificou o levantamento de reparos ás cinco asistencias técnicas polas que senta no banco, acusado dun delito de prevaricación continuada entre os anos 2008 e 2012, na "necesidade" de "prestar un servizo aos cidadáns" e porque "non había outra forma de facer a contratación".

Así o sinalou este martes á súa chegada aos Xulgados de Ourense, na primeira xornada do xuízo que se segue contra o rexedor; os ex edís Aurea Soto, Yolanda Pérez e Fernando Varela; e os directores xerais de Rehabilitación Urbana, José Carballido e José Somoza, para os que fiscalía reclama dez anos de inhabilitación para emprego ou cargo público.

Rodríguez, que chegou acompañado pola ex responsable de Urbanismo Aurea Soto, explicou que o levantamento de reparos é unha práctica que "se fai e seguirase facendo toda a vida" nos concellos e que "entende" que na súa actuación "non cometeu delito".

"Había que prestar un servizo aos cidadáns e non había outra maneira de facer a contratación", explicou o rexedor a preguntas da prensa.

Nesta liña abundou que, "en base aos informes dos técnicos do concello, decidiuse facer unha contratación de asistencias externas", que é un sistema que "leva feito desde hai 20 anos e séguese facendo".

A primeira xornada do xuízo contra o ex alcalde de Ourense (2008-2012) e outros cinco membros do bipartito PSOE-BNG estivo protagonizada polas declaracións dos cinco traballadores que foron contratados para asistencias técnicas, despois de que se acordase que os acusados sexan os últimos en declarar.

NON COÑECÍAN OS ACUSADOS

Os cinco testemuñas que declararon este martes coincidiron en apuntar que cando foron contratados por primeira vez non coñecían a ningún dos acusados, nin tiñan afiliación a ningún partido político.

Tamén insistiron en que durante o seu labor como asistentes técnicos non recibían ordes deles, senón dos responsables directos dos departamentos nos que traballaban.

Todos relataron que comezaron a traballar para o concello a través de asistencias externas (entre os anos 2008 e 2011) e que non se decataron da existencia de reparos por parte do interventor ata que deixaron de percibir o seu soldo no ano 2012.

Salvo unha das testemuñas, que relatou que "sabía" que o seu contrato era irregular e que "por iso había reparos", o resto coincidiu en que tiveron coñecemento de que se estaban levantando estes reparos cando empezaron a ter problemas para cobrar os seus soldos, pero que "non saben como se xustificaba" esta decisión.