Finaliza a rodaxe da serie 'Fariña' sobre o narcotráfico en Galicia nos anos 80

Imaxe da serie. Foto: Atresmedia

'Fariña', a nova ficción de Atresmedia, finalizou a súa rodaxe tras 26 semanas. Protagonizada polo actor galego Javier Rey, a serie narra a historia dos narcos galegos e trasládase ata Galicia para abordar o asunto empregando integramente localizacións reais.

Ademais de Javier Rey, o elenco protagonista de 'Fariña' confórmano actores da talla de Tristán Ulloa, Manuel Lourenzo, Antonio Durán 'Morris', Carlos Blanco, Jana Pérez, Marta Larralde, Tamar Novas, Fran Lareu, Xosé Antonio Touriñán e Celso Bugallo, entre outros.

A ficción ten un marcado AND galego, cunha repartición conformada en máis dun 90% por intérpretes desta comunidade e por unhas gravacións que tiveron lugar, case na súa totalidade, en Galicia: diferentes recunchos de Noia, Outes, Santiago de Compostela, Porto do Son, Pontevedra, Porto Meloxo e Illa de Arousa entre outros puntos.

ENTRADA EUROPEA DA DROGA

Anos 80. O contrabando de tabaco, que dalgunha forma arraigara na sociedade durante anos, dá paso ao narcotráfico. Os traficantes da zona póñense en contacto cos cárteles colombianos da droga e comezan a traficar con cocaína. O narcotráfico do po branco --que xa está a mover inxentes cantidades de diñeiro en EE.UU.-- chega a Galicia e, polo tanto, a España e ao resto de Europa.

Moi pronto, o 80% da cocaína que desembarca en Europa farao polas costas galegas. Os narcos galegos gañan incontables sumas de diñeiro e a serpe do narcotráfico comeza a estender o seu veleno por unha sociedade presa das dificultades económicas da época.

Moitos ven este negocio delituoso como unha maneira de saír adiante, de vivir ben. As institucións públicas non sempre actuarán como se lle esixe e haberá quen faga a vista gorda, outorgando poder aos capos da droga.