Os catro liderados provinciais do PSdeG decidiranse entre 16 aspirantes

|

Psdegpsoesede 1


A renovación do PSdeG aínda está pendente dos congresos provinciais que decidirán en decembro (en distintas datas) os novos liderados. En total, para catro provincias están na pugna 16 aspirantes, sete deles na Coruña.


O presidente da Deputación da Coruña, Valentín González Formoso, deu o paso o mesmo día que concluía o prazo de presentación de candidaturas ás primarias, cuxa primeira volta ten o 17 de decembro como data. Tras a súa decisión, segundo fontes da súa contorna, está a presión de distintos alcaldes e outros membros do partido.


O tamén rexedor das Pontes, xa competiu por este posto en 2012, fronte ao ex deputado autonómico José Manuel Lage e o ex ministro de Xustiza Francisco Caamaño, quen finalmente resultou vencedor.


Ademais de Formoso, tamén rexistraron o seu desexo de pugnar polas rendas do PSOE da Coruña outras seis persoas. Trátase do alcalde de Cariño, Miguel Alonso Pumar, o primeiro en anunciar a súa intención de concorrer; o rexedor de Ares, Julio Iglesias; e o tenente de alcalde en Culleredo, Diego Taibo. Así mesmo, postuláronse Lois Fermín Vázquez, da Coruña; Javier González Trillo, de Mazaricos; e Mercedes Rosón, ex concelleira en Santiago.


PACHI VÁZQUEZ, EN OURENSE


O ex secretario xeral do PSdeG e ex conselleiro de Medio Ambiente durante a etapa do bipartito, Pachi Vázquez, anunciou que competirá no proceso activado para ocupar a Secretaría Provincial do PSOE en Ourense, co obxectivo de "axudar, sumar" e conseguir un socialismo "máis forte e que peche feridas".


Xunto a Vázquez concorrerán o alcalde de Amoeiro, Rafael Villarino, o portavoz socialista no Concello de Taboadela, Álvaro Vila, e tamén a deputada autonómica Noela Blanco.


Vázquez explicou que a pesar de ser "case todo no partido" durante os últimos anos chega ás primarias do 17 de decembro "co contador a cero" pero "coa mesma ilusión que o primeiro día". Tamén recoñeceu que o proceso de primarias "non será un paseo militar" porque concorre con outros candidatos "que son moi bos e están moi preparados".


Noela Blanco, pola súa banda, adiantou que nos próximos días presentará unha solicitude formal ante a xestora provincial para a organización dun debate aberto a todos os medios de comunicación entre as diferentes candidaturas, unha vez estas sexan ratificadas a partir do día 1 de decembro.


DÚAS CANDIDATURAS EN PONTEVEDRA


As primarias do PSOE na provincia de Pontevedra decidiranse, previsiblemente, entre o concelleiro vigués David Regades, quen presentou uns 1.300 avais para formalizar a súa candidatura, e o edil redondelano Eduardo Reguera, quen achegou un total de 905.


Reguera chega a esta cita acompañado polo portavoz socialista en Pontevedra, Agustín Fernández, quen retirou a súa candidatura para axuntar forzas; mentres Regades logrou integrar ao alcalde de Ponte Caldelas, Andrés Díaz, a pesar da súa maior afinidade con quen estivo apoiando a Pedro Sánchez nas primarias federais e, posteriormente, a Gonzalo Caballero en Galicia.


Este proceso, que arrincou con catro precandidatos, servirá tamén para medir a forza do PSOE vigués fóra da cidade olívica --contando co rexedor caldelense-- e do sector máis próximo ao novo secretario xeral do PSdeG --que aposta por continuar a liña de "renovación" xurdida das primarias federais e galegas-- na súa propia provincia.


ÁLVARO SANTOS PRESÉNTASE EN LUGO


Os tres candidatos á Secretaría Provincial do PSOE de Lugo --o portavoz provincial, Álvaro Santos; o alcalde de Castroverde, José María Arias; e a tenente de alcalde de Burela, Patricia Otero-- presentaron tamén os avais para concorrer ás primarias, proceso que culminará o 3 de decembro coa elección do novo líder dos socialistas lucenses.


Santos estimou que superaría os cincocentos avales, cantidade que tamén calcula o alcalde de Castroverde, José María Arias.


Arias puntualizou que a súa candidatura "é a única que non está tutelada", e sinalou que a do portavoz provincial, Álvaro Santos, estaría "tutelada" pola Deputación e polo presidente provincial, Darío Campos, e a de Patricia Otero, tenente de alcalde de Burela, polo secretario xeral do PSdeG, Gonzalo Caballero.


Arias, afín ao vicepresidente provincial e alcalde de Becerreá, Manuel Martínez, aproveitou para lembrar que, no seu momento, apoiou a Caballero, na súa carreira á dirección galega.


"VIRREINATO PROVINCIAL"


O secretario xeral do PSdeG, Gonzalo Caballero, advertiu que o partido debe impulsar "un novo tempo político leal" coa nova dirección que el encabeza e engadiu que o "mandato da militancia" é que o "proxecto galego e galeguista" estea "por encima de calquera tipo de cuestións persoais ou estruturas provinciais".


Iso si, advertiu, sen apuntar a ninguén expresamente, que o PSdeG non pode "caer no erro de ter ningún tipo de virreinato provincial".


Aclarado este punto, deu a "benvida" a todos os candidatos provinciais e reafirmouse en que o obxectivo dos procesos é "fortalecer estas estruturas", e tamén recuperar e reforzar as comarcais, no marco do impulso do "novo tempo" dun partido "renovado, integrado e máis forte".


relacionada A dirección do PSdeG ratifica a Leiceaga como portavoz parlamentario
relacionada Villoslada defende que non reclamou "cotas" para a integración do novo PSdeG
relacionada Gonzalo Caballero asume con "vertixe" a "responsabilidade enorme" á fronte do PSdeG

Sen comentarios

Escribe o teu comentario




Non está permitido verter comentarios contrarios á lei. Nos reservamos o dereito a eliminar os comentarios que consideremos fora de tema.

Galiciapress
Praza da Quintana, 3; 15704 Santiago de Compostela
Tlf (34)678803735

redaccion@galiciapress.es o direccion@galiciapress.es
RESERVADOS TODOS OS DEREITOS. EDITADO POR POMBA PRESS,S.L.
Condicións de uso Consello editorial
Powered by Bigpress