Científicos da USC únense á alerta mundial sobre destrución ambiental e cambio climático
Máis de 15.000 científicos de todo o mundo asinan un manifesto que urxe grandes cambios ante os perigos para a humanidade.
Hai 25 anos, a asociación norteamericana Union of Concerned Scientists e máis de 1.500 científicos independentes escribiron 'A Advertencia dos Científicos do Mundo á Humanidade', na que reclamaban "un gran cambio na forma de coidar a Terra e a vida sobre ela" se quería evitarse unha "enorme miseria humana".
Na actualidade, a comunidade científica observou que, coa excepción de que se estabilizou a capa de ozono, desde 1992 a humanidade fracasou en facer suficientes progresos para resolver os desafíos ambientais previstos.
Isto, segundo apuntou a USC nun comunidade, é "especialmente preocupante" no "catastrófico cambio climático" de orixe humana debido ás crecentes emisións de GEI procedentes da queima de combustibles fósiles, a deforestación e a produción agrícola. Ademais, destacan a extinción masiva de especies.
Así, 25 anos despois da primeira advertencia, a comunidade científica volve alertar da situación nun 'Segundo Aviso á Humanidade', publicado en BioScience, con William J. Ripple, da Universidade Estatal de Oregon (EE.UU), como principal asinante e apoiado por máis de 15.000 científicos de todo o mundo, entre eles numerosos da USC como Celia Besteiro, Sofía Debén García, Emilio Díaz Varela, Pablo Guitián, Sara Martínez Santalla, Sara Pérez, Raquel Rodríguez Vázquez, Emilio Rolán, Victoriano Urgorri, Zulema Varela ou Sebastian Villasante.
Este novo manifesto advirte do perigo do futuro da humanidade dado o "desproporcionado consumo material e o aloucado crecemento da poboación mundial". Para corrixir a situación, apuntan diversas accións para a transición á sustentabilidade, como promulgar grandes reservas de hábitats protexidos; manter os servizos ecosistémicos da natureza; restaurar comunidades con plantas autóctonas a gran escala; ou remediar a extinción de especies animais, a caza furtiva e a explotación e comercio de especies ameazadas.
Escribe o teu comentario