A chamada para reducir o consumo de auga chega tamén ao área herculina

O director xeral de Augas de Galicia, Roberto Rodríguez, urxiu este venres aos municipios afectados pola activación da alerta por seca na área de influencia de A Coruña a reducir o consumo de auga nun 10 por cento, incidindo sobre todo nos grandes consumidores.

Rodríguez sinalou, en declaracións aos medios, que esa redución do 10 por cento debe recaer sobre os consumos "non prioritarios", por exemplo os industriais.

"Por onde habería que empezar sería por grandes usos industriais", asegurou o director de Augas de Galicia, que opina que a este tipo de consumidores habería que empezar a requirirlles que "moderen o seu consumo" e, ademais, "ver que tipos de procesos poden implementar para reducir o consumo de auga, aínda que sexa de maneira temporal".

Tamén comentou que todas as medidas que se tomen teñen que ir encamiñadas "a protexer a auga" embalsada e "protexer" o abastecemento á poboación. Para iso, insiste, "necesitamos reducir globalmente o consumo non prioritario un 10 por cento".

Rodríguez chamou aos concellos para colaborar na identificación de grandes consumidores e na implantación das medidas que sexan necesarias, porque "as administracións non podemos estar paradas mirando ao ceo ata que a auga chegue".

CONEXIÓN MEIRAMA E CECEBRE

No caso da área da Coruña, o director de Augas de Galicia explicou que as circunstancias son algo diferentes debido a que nesta zona a Xunta está a desenvolver unha infraestrutura que une o lago de Meirama e o encoro de Cecebre, o que permitiría articular "un bombeo provisional" para transvasar auga.

De feito, subliñou que a posibilidade de contar con esta unión ente Meirama e Cecebre confirma que "non hai risco inminente de desabastecemento para a poboación".