A USC accede a ser estrita coas visitas turísticas á biblioteca de Historia
Unha asociación estudantil queixouse das molestias que provoca aos alumnos a afluencia.
A Universidade de Santiago de Compostela (USC) accedeu a regular as visitas á biblioteca da facultade de Xeografía e Historia e implantar un horario fixo para "os visitantes alleos á institución", tras a petición presentada pola asociación estudantil Acción Universitaria.
A biblioteca desta facultade é, para a USC, "un dos elementos patrimoniais máis concorridos da cidade". Por este motivo, "son ondas de peregrinos as que chegan cada día a interromper a actividade dos estudantes que nela se atopan", segundo asegurara un dos representantes de Acción Universitaria, Alfonso Armesto.
A asociación estudantil xa advertira en numerosas ocasións de que era "necesario o deseño dun horario que puidese conciliar a actividade do alumnado coa turística", de maneira que todos puidesen gozar da estancia.
Ante a proposta, a USC finalmente accedeu a restrinxir as visitas á biblioteca co obxectivo de "facilitar o estudo e as tarefas de investigación á comunidade universitaria".
VISITAS
Fontes da universidade explicaron a Europa Press que actualmente xa hai dous horarios estipulados que se inclúen no programa de Visitas Guiadas ao Patrimonio Histórico da USC, un ás 10,00 horas para escolares e outro ás 12,00 para o resto de público.
As mesmas fontes indicaron que se van manter estes dous tipos de grupos de visitas, pero que se regulará o horario de acceso á biblioteca de forma máis ríxida do que é actualmente para compatibilizar a visita cultural e as necesidades dos estudantes da universidade.
Escribe o teu comentario