A Deputación da Coruña premia dez proxectos culturais en favor da igualdade
Convoca un concurso para apoiar economicamente proxectos que se desenvolvan nos distintos campos artísticos.
As áreas de Cultura e Igualdade da Deputación da Coruña poñerán en marcha un concurso que recoñecerá aqueles proxectos que contribúan a fomentar a igualdade desde o ámbito cultural.
A vicepresidenta provincial e responsable da área de de Cultura, Goretti Sanmartín, e a deputada de Igualdade, Ánxela Franco, presentaron esta iniciativa, á que se destinan na primeira convocatoria un total de 200.000 euros.
A nova iniciativa está destinada a premiar o desenvolvemento de dez propostas artísticas e iniciativas culturais anuais que promovan socialmente a igualdade de xénero desde o campo da cultura.
Ao mesmo, poderanse presentar proxectos orixinais e inéditos que se desenvolvan parcial ou totalmente ao longo do ano nos distintos campos artísticos "do son, a palabra, a escena, as artes plásticas, a imaxe ou outras contornas creativas como a arte urbana ou dixital".
Escribe o teu comentario