Denuncian islamofobia en Alvedro contra mozas con veo islámico

|

Veloislamico 1


SOS Racismo Galicia denunciou "actos de islamofobia" contra dúas mozas que levaban o pelo tapado con hiyab nos aeroportos da Coruña e Bilbao, onde foron sometidas a "exames aleatorios de explosivos".


Nun comunicado, a asociación explicou que as dúas mozas formaban parte do equipo de SOS Racismo Galicia que iniciaba a súa viaxe cara ao Congreso de Islamofobia de Xénero, organizado pola Federación SOS Racismo celebrado na cidade vasca.


Segundo explica a entidade, unha vez no control da terminal herculina, dúas persoas foron apartadas do grupo formado por oito mulleres para realizarlles un "control aleatorio" das súas pertenzas. "Isto, nun principio, non parece un acontecemento fóra da normalidade, a non ser que se atenda ao detalle de que as dúas mozas separadas eran as únicas portadoras do hiyab", sinalou SOS Racismo.


Este feito, conforme indicou a asociación, volveuse repetir no control de seguridade do aeroporto de Bilbao, onde as novas portadoras do hiyab foron sometidas de novo a un exame "aleatorio". Con todo, nesta ocasión, non eran as únicas que levaban o pelo tapado.


Respecto diso, SOS Racismo asegurou que "utilizar o hiyab como método de detección de posibles persoas sospeitosas vulnera todos os dereitos das mulleres musulmás que deciden levar esta peza de roupa". "O ocorrido nos aeroportos de Bilbao e A Coruña son actos de islamofobia, comportamentos abusivos e ofensivos que, a forza de ser repetidos, están xa fixados na sociedade que chega a percibir estes feitos como algo normal", denunciou.


Por estes feitos, SOS Racismo Galicia explicou que interpuxo unha queixa formal ante Aena, como entidade responsable dos aeroportos en territorio español, o pasado día 26 de outubro.


relacionada Crece o temor a que se estenda unha "brutal onda" de islamofobia

Sen comentarios

Escribe o teu comentario




Non está permitido verter comentarios contrarios á lei. Nos reservamos o dereito a eliminar os comentarios que consideremos fora de tema.

Galiciapress
Praza da Quintana, 3; 15704 Santiago de Compostela
Tlf (34)678803735

redaccion@galiciapress.es o direccion@galiciapress.es
RESERVADOS TODOS OS DEREITOS. EDITADO POR POMBA PRESS,S.L.
Condicións de uso Consello editorial
Powered by Bigpress