A Xunta premia aos municipios 'emprendedores' á hora de optar a axudas

Os concellos galegos 'emprendedores' que rebaixen impostos, minimicen a burocracia e baixen o tempo de concesión de licenzas para as firmas que se establezan por primeira vez no seu territorio terán máis puntuación que o resto para acceder a axudas da Administración autonómica por importe de 42 millóns de euros.

Diso informou Núñez Feijóo ao termo da reunión semanal do seu Executivo, que analizou o total de ordes ás que poderán optar estes concellos 'emprendedores', tras o acordo alcanzado coa Federación Galega de Municipios e Provincias (Fegamp) e subscrito recentemente.

As ordes nas que terán prioridade, cuxo importe total ascende a 42 millóns de euros, están ligadas a iniciativas de fomento do emprendemento, da industria, e a potenciar a creación de emprego.