A "burbulla" das macrogranxas supón un risco para acuíferos e terras agrícolas

Explotación tradicional.

España vive unha "burbulla" de demanda de porco e os seus derivados no mercado nacional e especialmente no internacional, sobre todo en países como China, o que está a motivar un aumento do número de granxas de porcino, así como do seu tamaño, segundo alerta SEO/BirdLife.

Con todo, estes proxectos teñen unhas graves repercusións ambientais na contorna, especialmente polo uso intensivo que fan da auga, a mala xestión dos xurros e a consecuente contaminación por nitratos do chan e os acuíferos.

Pero, ademais, polo uso intensivo que fan de chan agrícola e a perda da gandería tradicional como o ovino, segundo denuncia a ONG, que advirte da gravidade da situación, especialmente en Castela e León ou Aragón, onde proliferan os permisos para instalar macrogranxas.

MACROGRANXA EN SORIA

O que máis afecta a Galicia, con todo, non é o sector do porcino, senón do vacún e o lácteo. Especialmente preocupante para as explotacións galegas é un proxecto que unha cooperativa navarra pretende implantar en Soria.

Esta explotación láctea contará cunhas 20.000 vacas, converténdose na máis grande de toda Europa. Unha granxa que para o Sindicato Labrego Galego provocaría o peche de ata mil explotacións galegas.

AVALIACIÓN AMBIENTAL

Cada proxecto leva varios trámites ademais da licenza urbanística e ambiental, como a subministración de auga ou electricidade e, aínda que cada proxecto debe pasar a súa correspondente declaración de impacto ambiental, é "case imposible" facer un seguimento, xa que a tramitación en ocasións depende do Concello pero noutras o permiso ha de vir da deputación e finalmente da comunidade autónoma.