"O galego ten palabras moi difíciles", usado como escusa para impoñer o castelán
A Mesa pola Normalización Lingüística denuncia que FADEMGA vulnera os dereitos lingüísticos do seu alumnado.
Extracto das normas da proba. Foto: A Mesa
A Mesa pola Normalización Lingüística tramitou unha queixa ante a Federación Galega de Asociacións en favor das Persoas con Discapacidade Intelectual ou do Desenvolvemento (FADEMGA) pola "grave vulneración de dereitos lingüísticos básicos do seu alumnado".
Tal e como informa a entidade nun comunicado, a Federación imparte cursos de formación nos que se facilita ao alumnado unha copia do exame en galego e outra en castelán. "Con todo, nas normas para a realización da proba indícase que unicamente se realice en castelán", destacan.
O argumento para esta indicación, tal e como traslada A Mesa, di que "estivestes estudando e facendo actividades en castelán. O modelo en galego ten palabras moi difíciles".
A entidade defensora da lingua galega ve nestes feitos "un evidente caso de vulneración" dos dereitos lingüísticos.
O seu presidente, Marcos Maceira, apunta que actuarán para acabar con estas actitudes, nas que ven "un desprezo á nosa lingua e cultura". Ademais, animan á cidadanía a denunciar situacións semellantes.
Escribe o teu comentario