Alcoa sae de perdas nos nove primeiros meses do ano pola subida do aluminio

O fabricante estadounidense de aluminio Alcoa gañou 413 millóns de dólares (349 millóns de euros) nos nove primeiros meses do ano, fronte ás perdas de 275 millóns de dólares (233 millóns de euros) correspondentes ao mesmo período de 2016, segundo informou a multinacional, que revisou á alza as súas previsións anuais ante a subida de prezos do aluminio.

A cifra de negocio de Alcoa, implantada en San Cibrao e A Coruña, alcanzou entre xaneiro e setembro un total de 8.478 millóns de dólares (7.177 millóns de euros), un 25% máis que un ano antes.

No terceiro trimestre, a compañía obtivo un beneficio neto atribuído de 113 millóns de dólares (96 millóns de euros), fronte ás perdas de 10 millóns de dólares (8,4 millóns de euros) no mesmo período de 2016.

Debido á maior fortaleza dos prezos do aluminio, Alcoa revisou á alza a súa previsión de Ebitda axustado, ata uns 2.400 millóns de dólares (2.032 millóns de euros), fronte ao anterior rango de entre 2.100 e 2.200 millóns de dólares (1.778 e 1.863 millóns de euros), incluíndo os maiores custos de produción.

"Alcoa segue beneficiándose dun mercado de materias primas favorable e revisamos á alza as nosas previsións anuais de rendibilidade e de crecemento da demanda de aluminio", declarou Roy Harvey, presidente e conselleiro delegado.