A Fundación Blanco Amor ponse en marcha coa conservación da súa biblioteca
Impulsará a promoción e tradución da obra do escritor ourensán.
A Fundación Blanco Amor iniciará as súas actividades coa catalogación e conservación da biblioteca e o arquivo documental do escritor, que se conservan na Deputación de Ourense.
Así o confirmaron fontes do ente provincial con motivo da constitución este martes da Fundación, unha entidade que nace co obxectivo de conservar e difundir a obra do autor de 'A Esmorga'.
O acto, que tivo lugar nas instalacións do Liceo de Ourense, contou coa presenza do presidente da Deputación e máximo responsable da Fundación, Manuel Baltar, así como dos patróns da entidade e do alcalde de Ourense, Jesús Vázquez.
A Fundación impulsará a promoción e tradución da obra do escritor ourensán; así como a investigación, catalogación e conservación do arquivo documental que se conserva de Blanco Amor.
Entre os seus obxectivos tamén destaca a realización de actividades culturles e de dinamización sociocultural de calquera tema relacionado con Eduardo Blanco Amor en Ourense, Galicia, España e nos países de Sudamérica nos que residiu o escritor.
Esta preocupación por manter vivo o legado do autor de 'A Esmorga' ou 'Xente ao Lonxe' tamén se incentivará a través de diversas actividades en sectores vinculados ao escritor como a literatura, o xornalismo, a lingua galega, a fotografía ou os estudos realizados tanto polo autor galego como polos investigadores da súa obra.
Escribe o teu comentario