A mina de Touro "non crea riqueza nin valor engadido aquí e deixa un desastre ambiental"

|

MinibngMini, na rolda de prensa.

O BNG alertou da reactivación da mina de cobre de Touro (A Coruña), un proxecto extractivo "do século XIX" que "non crea riqueza" en Galicia e que vai deixar " un desastre ambiental" debido a que non existe "a garantía" de que a zona vaia ser rehabilitada de forma conveniente unha vez finalice a súa actividade.


O deputado nacionalista Xosé Luís Rivas 'Mini' ofreceu este venres unha comparecencia de prensa para saír ao paso da "alarma social" creada tras o anuncio da continuación da actividade na mina situada en Touro, que pon en risco "explotacións agrícolas de gran interese nunha das zonas agrícolas máis importantes do país".


"Estariamos a repetir o mesmo esquema que se falaba en Corcoesto, que se falaba na Terra Chá ou o que estamos a falar con Erimsa en Mesía, Ordes, Oroso e Frades. Sempre é o mesmo, leva o mineral, non se crea riqueza nin valor engadido aquí, e déixase un desastre ambiental", comentou.


E é que, segundo o parlamentario, a de Touro é "unha actividade expoliadora", xa que "van sacar 350.000 toneladas de mineral a un 23 por cento de riqueza de cobre" que serán levados fóra de Galicia para ser tratados, mentres os restos "van ser enclaustrados" nunha "balsa de 126 hectáreas de superficie".


"Estamos a falar de materiais altamente contaminantes, dunha acidez tremenda e de gran cantidade de materiais pesados. Non é que o BNG estea en contra da actividade mineira, o que si estamos en contra é dunha actividade expoliadora", incidiu.


A mina ao descuberto situada entre os municipios de Touro e O Pino concentrou a súa actividade entre os anos 1973 e 1986. Nese momento, segundo indicou Rivas, non houbo un plan de restauración da zona, na que se creou unha "balsa e un bombeo" que "agudiza a presión contaminante que exercen os restos".


500 HECTÁREAS EN "PERIGO"


Agora, o proxecto de reapertura da mina --impulsado pola sociedade Explotacións Galegas e a multinacional Atalaya Mining e que xa deixou atrás a fase de alegacións-- xerou unha "alarma social", xa que afecta a 669 hectáreas, das que 500 son de uso agrario nunha zona onde se asentan explotacións gandeiras e varias queserías.


"Estamos a falar de actividades de transformación das que o sector agrario está tan necesitado", engadiu Rivas, que mostrou a súa preocupación ante a posibilidade de que as ditas hectáreas "queden afectadas para sempre".


Así as cousas, instou a que se estableza unha "garantía" tanto por parte da Administración galega como da empresa explotadora da mina de que, unha vez finalizada a actividade, a área sexa "restaurada convenientemente".


relacionada Veciños de Touro loitan contra o proxecto mega-mineiro que ameaza a súa contorna
relacionada Salvemos Cabana anima a que os cidadáns impulsen as alegacións contra a mina de Touro
relacionada Mobilización social contra un proxecto megamineiro na comarca de Santiago

Sen comentarios

Escribe o teu comentario




Non está permitido verter comentarios contrarios á lei. Nos reservamos o dereito a eliminar os comentarios que consideremos fora de tema.

Galiciapress
Praza da Quintana, 3; 15704 Santiago de Compostela
Tlf (34)678803735

redaccion@galiciapress.es o direccion@galiciapress.es
RESERVADOS TODOS OS DEREITOS. EDITADO POR POMBA PRESS,S.L.
Condicións de uso Consello editorial
Powered by Bigpress