O concello ten preparada a vía xudicial para recuperar as estatuas

Expediente que demostra a propiedade das esculturas.

O alcalde de Santiago, Martiño Noriega, asegurou este venres que o Concello traballa nunha estratexia para seguir no caso de que a familia Franco non devolva as estatuas da Catedral de Santiago.

Tal e como lembrou o rexedor compostelán na rolda de prensa tras a xunta de goberno local, a familia Franco ten de prazo ata este luns 16 de outubro para devolver as dúas estatuas do Mestre Mateo que están no seu poder.

Ata o momento, o Concello de Santiago estivo certificando toda a documentación atopada nos arquivos da Universidade, pois toda a documentación municipal anterior a 1960, precisou o alcalde, figura nestes arquivos.

De igual modo, engadiu, o Consistorio está a traballar na identificación das pezas e na estratexia a seguir no caso de que a familia Franco non devolva as estatuas, cousa que o alcalde sospeita que non fará.

Se non as devolve, o rexedor asegurou que se podería iniciar o proceso xudicial a semana que vén.

MONTE DO GOZO

Preguntado polo feito de que a Xunta tivo que declarar deserto o concurso para a explotación do Monte do Gozo, ao non presentarse ningunha empresa á licitación aberta, o alcalde de Santiago limitouse a dicir que "algunhas veces é imputable ás condicións do prego e outras á situación do mercado".

"Cónstanos que, desde Turismo, se fai un esforzo por revitalizar a zona", subliñou o rexedor, quen espera que "se reconduza a situación polo ben da cidade" e que a revitalización do Monte do Gozo "acabe sendo unha realidade".