Dez consellos para aprender a aforrar auga e dez motivos para poñelos en práctica

Fragmento do cartel difundido por Viaqua.

En plena seca, Viaqua distribuíu aos concellos e centros educativos un cartel para concienciar sobre o uso responsable da auga. Nel recóllense dez medidas de aforro que podemos aplicar no noso día a día e os motivos para poñelas en práctica.

A intención é que a poboación sexa consciente da cantidade de auga que se desperdicia sen motivo e promover un cambio de hábitos, contribuíndo "a concienciar aos máis novos no uso sustentable da auga e o coidado do noso medio ambiente".

Xunto ao cartel (que podes atopar ao final desta información), o director de Viaqua, Julio Masid, enviou unha carta aos responsables municipais e dos centros escolares convidando a divulgar os consellos.

"Se todos consumimos a auga que realmente necesitamos e a tratamos ben, todos gozaremos dela", resume o director de Viaqua no escrito.

Ademais, en Ourense, a empresa acompañou esta campaña coa instalación dun posto na rúa para informar directamente á cidadanía.