O Corredor do Morrazo pecha ao tráfico este luns ata o mes de maio

Túnel de Montealegre.

Tal e como xa anunciara a Xunta, o Corredor do Morrazo pecha ao tráfico este luns para facilitar as obras de ampliación do túnel de Montealegre e avanzar nos traballos de desdobramento. O peche prolongarase ata o próximo mes de maio, cando está previsto que entren en servizo os dous primeiros tramos do viario, xa convertidos en autovía.

Esta decisión é resultado das conversacións cos concellos de Moaña, Cangas, Bueu e Vilaboa, e da necesidade de preservar o castro de Montealegre, en Domaio. Este obxectivo implica acometer unha complexa obra de enxeñería, sen precedentes en Galicia, para ampliar o ancho do túnel que discorre por baixo do xacemento arqueolóxico.

Con respecto ao tramo III do Corredor, co fin de non atrasar a obra e minimizar a afección ao tráfico, implementarase un desvío provisional para evitar as zonas onde se realizarán voaduras.

Para paliar os efectos do peche, reforzáronse as frecuencias nas liñas de transporte marítimo de ría, así como o servizo de ambulancias no Morrazo.