Rexeitamento ante o Hórreo á "depredación" que propicia a lei de fomento empresarial

|

Leidepredacionmineria


Máis de medio cento de persoas deuse cita este venres fronte ao Parlamento, coincidindo coa última xornada do Debate sobre o Estado da Autonomía, para censurar a "depredación do rural" que persegue o PP coa súa proposta de lei de fomento da iniciativa empresarial.


Para explicar aos xornalistas a posición da recentemente creada Plataforma contra a Lei de Depredación de Galiza, Margarida Prieto Ledo, do Sindicato Labrego Galego, advertiu de que a norma pretende "anular todos os controis e a protección" existente para converter en "donas do territorio" galego "as grandes multinacionais".


Ademais, subliñou que os proxectos que se verían favorecidos por esa normativa "destrúen máis emprego do que crean" e que este, en todo caso, "é precario e temporal".


Así é que deixou claro que a plataforma chegará "onde sexa" para "impedir" a aprobación deste texto introducido na Cámara galega pola vía de urxencia. Nese sentido, avanzou a convocatoria dunha manifestación a nivel autonómico para o próximo día 22, ademais doutras medidas que se irán decidindo.


E é que, como dixo Prieto Ledo, esta norma facilitaría a posta en marcha de "moitos proxectos", como o de extracción de cuarzo na Terra Cha (Lugo), pois "evitarían moitos informes" que ata agora eran necesarios para as actividades mineiras.


"ESTOCADA AO RURAL"


E, mentres insistía en que a lei sería "unha estocada ao rural galego", os concentrados coreaban cánticos contra "o espolio" dos recursos e para censurar "a caradura do PP".


Ata a protesta, con pancartas 'En defensa da nosa terra' e advertindo de que 'Galiza non é unha mina', achegáronse deputados do BNG e En Marea para expresar a súa coincidencia.


relacionada Numerosos colectivos únense contra a que denominan "Lei de Depredación de Galicia"
relacionada Veciños de Touro loitan contra o proxecto mega-mineiro que ameaza a súa contorna
relacionada Mobilización social contra un proxecto megamineiro na comarca de Santiago

Sen comentarios

Escribe o teu comentario




Non está permitido verter comentarios contrarios á lei. Nos reservamos o dereito a eliminar os comentarios que consideremos fora de tema.

Galiciapress
Praza da Quintana, 3; 15704 Santiago de Compostela
Tlf (34)678803735

redaccion@galiciapress.es o direccion@galiciapress.es
RESERVADOS TODOS OS DEREITOS. EDITADO POR POMBA PRESS,S.L.
Condicións de uso Consello editorial
Powered by Bigpress