A crise territorial centra os últimos reproches do debate de política xeral

Este venres interviñeron os viceportavoces.

A situación de Cataluña e os seus efectos sobre a política galega seguen na primeira liña do Debate do Estado da Autonomía que se celebra no Pazo do Hórreo.

Neste contexto, o secretario xeral do PPdeG e viceportavoz parlamentario, Miguel Tellado, cargou duramente contra a postura de BNG e, con especial intensidade, de En Marea, e proclamou que "apoiar os independentistas cataláns é traizoar a España e a Galicia". "Os que apoian a golpistas tamén son golpistas", engadiu.

Fíxoo na súa intervención na última xornada do primeiro Debate sobre o Estado da Autonomía da X Lexislatura, horas despois de alcanzar un acordo de transacción co PSOE para que avale a súa proposta, con leves modificacións, de adherirse ao discurso do Rey Felipe VI e apoiar ás forzas de seguridade, que rexeitarán BNG e En Marea.

Tellado agradeceu "o sentido común" e a "responsabilidade" do PSdeG polas transaccións seladas, á vez que manifestou o seu desexo de que este "sentido común" chegue a Madrid.

"Tampouco lles pedimos ningún postulado revolucionario", remarcou, antes de concluír que, en vista do que pasa na Cámara autonómica, a oposición "podería ser unha comedia, pero é un drama".

PROPAGANDA

O viceportavoz de En Marea, Antón Sánchez, argumentou que "votaremos que non porque non admitimos leccións de democracia do herdeiro de Franco, faltoulle cuestións de estilo, pero sempre se sabe que as copias son malas".

Precisamente, sobre o conflito catalán, aproveitou para asegurar que "o valor dunha Constitución política se basee na súa capacidade para acompañar os cambios da sociedade" e "non en aferrarse ao inmobilismo". "Vostedes están ao servizo dos consensos obrigados, nós a favor da pluralidade", sinalou. "Non hai dereito na Constitución que vostedes non teñan golpeado ou ultraxado", apuntou.

Ademais, acusou ao Feijóo de exercer de "militante sumiso" do Partido Popular de Madrid e de "non estar ao servizo de Galicia". "Sacrifica todos os intereses dos galegos, traga rodas de muíño e aplaude cando os seus amigos ultraxan a Galicia", censurou.

"POLÍTICOS DE VERDADE"

A viceportavoz parlamentaria do PSdeG, Patricia Vilán, apelou ao presidente da Xuntaa comezar a dar pasos para reformar o Estatuto de Autonomía. "Cando os gobernantes pasan á Historia é cando fan política en momentos complexos", sinalou.

De igual modo, defendeu que tamén toca expor a reforma da Constitución ante os feitos que se suceden en Cataluña. "Os socialistas deploramos a ruptura da orde constitucional", deixou claro, antes de recalcar que "en momentos de tempestade, é xustamente cando os políticos de verdade teñen que estar á altura das circunstancias".

Finalmente, Patricia Vilán expresou o seu rexeitamento á proposta do PP de reformar a lei electoral para que goberne a forza máis votada.

Sobre todo, tras subliñar que os populares están a apoiar unha moción de censura en Tui para desaloxar a un alcalde socialista e que o seu lugar o cupe o líder dunha forza minoritaria.

"RESIGNACIÓN E CONFORMISMO"

A viceportavoz do BNG, Olalla Rodil, asegurou que a que presenta o Partido Popular na Cámara galega "non é a única Galicia posible" e instou ao Goberno da Xunta a "non permanecer inmóbil" nun dos momentos políticos "máis convulsos dos últimos 40 anos".

"Porque ante as incertezas, o que máis medo nos dá é que todo siga igual, que despois dos golpes da crise, da política neoliberal, dos recortes... que despois de todo iso, gañe a resignación e o conformismo", sinalou.

Todo iso para acabar o seu discurso trasladando á Cámara a petición dos nacionalistas de poñer en marcha un relatorio que permita "superar" o actual marco estatutario e constitucional.