Adif licita as obras do ramal provisional entre Taboadela e Ourense
Conectará a vía do AVE coa liña convencional. Leva tres meses de atraso, pero Adif asegura que se cumprirán os prazos.
A execución das obras de construción da Liña de Alta Velocidade Madrid-Galicia continúa o seu desenvolvemento coa publicación este xoves no Boletín Oficial do Estado da licitación da construción do ramal provisional que conectará a liña de alta velocidade en Taboadela co trazado actual para acceder a Ourense.
Este ramal, en cuxa construción se investirán 7,3 millóns de euros "permitirá a continuidade da conexión ferroviaria de alta velocidade entre a cidade de Ourense e a Meseta", destaca Adif.
En relación a outras actuacións que afectan á provincia ourensá, Adif lembra que "recentemente se informou publicamente a través do BOE do proxecto de remodelación da estación de Ourense que permitirá a chegada da Alta Velocidade á dita cidade".
A pesar de que este proxecto acumula tres meses de atraso, Adif asegura que "todas estas obras teñen un prazo de execución que permitirá cumprir os compromisos para a chegada da alta velocidade a Galicia nos prazos previstos".
Escribe o teu comentario