A Mesa reclama a dimisión da Valedora pola súa "visión ideolóxica e sectaria" do galego

A Mesa rompe coa Valedora. Foto: A Mesa

A Mesa pola Normalización Lingüística esixe a dimisión da Valedora do Pobo, Milagros Otero, polo que consideran "un novo desprezo por parte da responsable desta institución ante a vulneración de dereitos lingüísticos".

A Mesa critica nun comunicado que "recibiu un novo escrito da Valedora, no cal se xustifica a deturpación dos nomes de núcleos de poboación e demais topónimos cando sexa necesario e a efectos de identificación".

A asociación en defensa e promoción do galego anuncia, ademais, que deixará de tramitar cuestións de lingua con esta institución, ao entender que amparou a vulneración de dereitos ou desatendeu en numerosas ocasións as queixas trasladadas.

O presidente da Mesa Marcos Maceira argumentou que "a Valedora actúa nas cuestións relacionadas coa lingua galega cunha visión ideolóxica e sectaria" e criticou que "é capaz de retorcer a lexislación para chegar á súa conclusión prefijada a costas da súa función".

Maceira engadiu que "coa súa actitude mal pode arrogarse a nobre defensa da sociedade galega nin ser a súa defensora a quen está máis preocupada por defender o statu quo e preeminencia do castelán que aplicar a lei de forma xusta, ponderado e equilibrada". "Non pode continuar no seu cargo un minuto máis" concluíu.