O Dépor aproveita a semana sen Liga para quitarse presión

Como esta fin de semana non hai partido de liga, debido aos partidos das seleccións nacionais, o Deportivo terá un compromiso benéfico. Será o xoves en Riazor ante o Corinthians de Brasil, con motivo do Memorial Moncho Rivera.

Ademais, o primeiro equipo, xa sen a presenza dos internacionais (Borges, Tyton, Andone, Pantilimon, Valverde e Schär) encara tres sesións de adestramento en Abegondo con menos presión que a última semana.

E é que como manifestaron Lucas Pérez e Andone tras o partido do sábado, no vestiario "respírase moita tranquilidade", tras unha vitoria moi necesitada da que os xogadores saen fortalecidos mentalmente.

Con todo, Pepe Mel segue asumindo a súa situación, ao manifestar que "temos unha ampla marxe de mellora e cousas que traballar e estou aquí para traballar mentres que o Dépor queira".

Tras o encontro subliñou tamén que "a harmonía do grupo é importante. O grupo está xunto para facer as cousas. E así se demostrou. Tanto os que xogaron como os tres que saíron logo. Todos demostraron que queren gañar, que queren sacar desta situación ao Dépor. Alégrome por eles, porque ao final son os protagonistas verdadeiros".